«Առողջապահության նախարար Լեւոն Ալթունյանը տապալել է առողջապահական քաղաքականությունը եւ իրականացնում է «հիվանդապահության» քաղաքականություն: Նա զբաղվում է ապահովագրական շուկայի քաղաքականությամբ՝ առողջապահական ապահովագրության սոցփաթեթները տալով իր ապահովագրական ընկերությանը: Նա փորձում է առողջապահության վրա ծախսվելիք պետական փողերն օգտագործել միայն բիզնես-շահերի համար»,-այսօր մի խումբ բժիշկների մասնակցությամբ քննարկման ժամանակ հայտարարեց «Տնտեսական իրավունքի կենտրոն» հ/կ ղեկավար Մովսես Արիստակեսյանը:
Ինչ վերաբերում է դեղերի՝ դեղատոմսով դուրսգրման կարգին, Արիստակեսյանը նկատեց՝ դա ճիշտ է. դեղը պետք է դեղատոմսով վաճառվի, այդպես է շատ երկրներում. «Դա պատասխանատվություն է նախեւառաջ բժշկի, հետո՝ դեղատան վաճառողների համար: Քաղաքացին էլ չպետք է լսի մորաքրոջ քավորի խորհուրդը եւ ինքնաբուժությամբ զբաղվի: Նա պետք է գնա պոլիկլինիկա, հետազոտվի ու բուժում ստանա: Նախարարությունն այստեղ մեկ սխալ է միայն արել՝ այդ բարեփոխումից մեկ ամիս առաջ պետք է իրազեկեր՝ պատրաստեր հասարակությանը, բժիշկներին, գովազդներ տարածեր այդ մասին: Պետք է բացատրեր, որ դա քաղաքացիների շահերից է բխում: Մինչդեռ դա մեկ գիշերում որոշվեց, ու ոչ ոք պատրաստ չէր այդ կարեւոր քայլին»:
Արիստակեսյանի խոսքով՝ պոլիկլինիկաներում լաբորատոր հետազոտությունների որակն ու մակարդակը կասկածելի է. «Նախարարությունը դեղատոմսերի խնդրից առաջ նախ դրանով պետք է զբաղվեր: Պոլիկլինիկաներ ունենք, որտեղ 40 տարվա ռենտգեն-սարք կա: Առանց նման խնդիրները լուծելու չի կարելի դեղատոմս գրել: Չէ՞ որ հետազոտությունից հետո է բժշկի կողմից դեղատոմս գրվում»:
Լուիզա ՍՈՒՔԻԱՍՅԱՆ
