Մարտի 23-ին «Բյուրոկրատ» գրախանութում տեղի ունեցավ Tatron-drama.am կայքի շնորհանդեսը: Կայքի հիմնադիրը եւ խմբագիրը Կարինե Խոդիկյանն է: Հարցին՝ ո՞րն է կայքը ստեղծելու նպատակը, Կ. Խոդիկյանը պատասխանեց, որ ուզում է այն դառնա հայ դրամատուրգների տունը. «Հիմնական նպատակն է մեկ հարթակ բերել դասական ու արդի դրամատուրգիան եւ Հայաստանում գործող թատրոնները, ինչպես նաեւ՝ տեսական հոդվածների, հրապարակումների միջոցով ներկայացնել արդի թատերական կյանքի հիմնախնդիրները եւ հետագա զարգացման միտումները»:
Կայքի վեբ դիզայներ Նառա Վարդանյանն էլ , խոսելով կայքի մասին, ասաց. «Դրամատուրգիա բաժնում առանձնացրել ենք հեղինակներ, պիեսներ եւ թարգմանական պիեսներ: Թատրոն բաժնում անցուդարձերն են, թատերական տեսությունները: Նախատեսում ենք, որ ապագայում կլինեն դիմանկարներ, հարցազրույցներ, նորություններ»:
Կարինե Խոդիկյանի կողքին էին իր ընկերները, որոնք հանրապետությունում հայտնի գրչի ու թատրոնի մարդիկ են՝ Երվանդ Ղազանչյան, Նորայր Ադալյան , Գուրգեն Խանջյան, Տիգրան Մարտիրոսյան:
Խոսելով ապագայում նախատեսվող ծրագրերից՝ տիկին Խոդիկյանն ասաց, որ մտադիր է ստեղծել վիրտուալ մատենաշար, որում առաջինը կընդգրկվեն Լեւոն Շանթը եւ Հակոբ Պարոնյանը:
Tatron-drama.am կայքը այժմ գործում է հայերեն եւ ռուսերեն, բայց նախատեսվում է նաեւ անգլերեն տարբերակը:
Գայանե ԻՍՐԱՅԵԼՅԱՆ
