Արա Գոչունյանը, Ռոպեր Հատեճյանը եւ այլք՝ Արամ Աթեշյանին կից խորհրդակցական մարմնում

Պատրիարքական Ընդհանուր Փոխանորդ Բարձրաշնորհ Տ. Արամ Ս. Արքեպսկ. Աթէշեանի տնօրինութեամբ՝ երէկուան դրութեամբ Պատրիարքական Աթոռէն ներս վերակազմուեցաւ խորհրդակցական մարմին մը։ Տասնամեակներու նախընթացներու հիման վրայ, վերջին տարիներու ակամայ ընդհատումէն վերջ, Նորին Սրբազնութեան կարգադրութեամբ վերահաստատուեցաւ Խորհրդակցական մարմինը, որ կը բաղկանայ 12 անդամէ։

Նկատի ունենալով Պատրիարքական Աթոռին դիմագրաւած մարտահրաւէրները, Խորհրդակցական մարմինը պաշտօնի կոչուած է՝ որպէսզի մեր ժողովուրդի ընդհանուր տրամադրութիւնները եւ մերազն համայնքի ակնկալութիւնները աւելի լաւ արժեւորուին Պատրիարքարանի կողմէ ծաւալուած գործունէութեան մէջ։ Բարձրաշնորհ ընդհանուր փոխանորդ սրբազան հայրը Խորհրդակցական մարմնի անդամակցութեան հրաւիրած է բարի համբաւի տէր դէմքեր, որոնք իրենց նուիրեալ ծառայութիւններով համատարած յարգանքի ու վստահութեան արժանացած են թրքահայ ազգային-եկեղեցական կեանքէն ներս, բարձր վարկ ձեռք բերած են յաչս մերազն ժողովուրդին, կ՚առանձնանան իրենց առաջնորդող դերակատարութեամբ եւ միշտ սկզբունքային նախանձախնդրութիւն դրսեւորած են Պատրիարքական Աթոռի հեղինակութեան նկատմամբ։

Երէկ յետմիջօրէին, Պատրիարքարանի դահլիճին մէջ, Բարձրաշնորհ Տ. Արամ Ս. Արքեպսկ. Աթէշեանի նախագահութեամբ, նորակազմ Խորհրդակցական մարմինը գումարեց իր անդրանիկ ժողովը։ Նորին Սրբազնութիւնը այս առթիւ իր օրհնութիւններն ու յաջողութեան մաղթանքը յղեց ժողովականներուն։ Առաջին խորհրդակցութեան ընթացքին ժողովականները կարծիքի փոխանակումներու միջոցաւ ընդհանուր արժեւորումի ենթարկեցին թրքահայ համայնքային կեանքի առկայ վիճակը, սեղանի վրայ դրին իրենց դիտարկումները եւ Նորին Սրբազնութեան նկատառման յանձնեցին իրենց մօտեցումները՝ մեր իրականութենէն ներս աւելի համախումբ ու ներդաշնակ միջավայրի մը ստեղծման առումով։ Քննարկումներուն համադրութիւնը յառաջիկայ օրերուն պիտի ներկայացուի հանրային կարծիքի ուշադրութեան։

Խորհրդակցական մարմնին մաս կը կազմեն հետեւեալ անունները.

Տի­կին Նա­տիա Թա­շէլ

Տիար Պետ­րոս Շի­րի­նօղ­լու

Տիար Տիգ­րան Կիւլ­մեզ­կիլ

Տիար Ա­րէտ Եր­կա­նեան

Տիար Հայկ Աս­լա­նեան

Տիար Հեր­ման Պա­լեան

Տիար Հրանդ Մոս­կո­ֆեան

Տիար Ե­սա­յի Տե­միր

Տիար Վազ­գէն Պա­րըն

Տիար Փրոֆ. Ա­ւե­տիս Հա­ճըն­լեան

Տիար Ռո­պէր Հատ­տէ­ճեան

Տիար Ա­րա Գօ­չու­նեան

Պատրիարքական Աթոռը կը գնահատէ յիշեալ անձնաւորութիւնները, որոնք Բարձրաշնորհ սրբազան հօր հրաւէրին ընդառաջ՝ պատրաստակամ գտնուած են մեր հաւաքական կեանքի դժուարութիւններու յաղթահարման ուղղեալ աշխատանքներուն մասնակցելու՝ ի բարօրութիւն մերազն համայնքի, ի շինութիւն մեր դարաւոր Պատրիարքարանի եւ ի պայծառութիւն մեր Սուրբ Եկեղեցւոյ։

ԴԻՒԱՆ ՊԱՏՐԻԱՐՔԱՐԱՆԻ