Այսօր արդարադատության նախարար Դավիթ Հարությունյանը ԱԺ արտահերթ նիստում երկրորդ ընթերցմամբ ներկայացրեց «Կառավարության կառուցվածքի եւ գործունեության մասին», ինչպես նաեւ կից ներկայացված տասնյակ օրենքների նախագծերի փաթեթը:
«Ելքը» դրանց վերաբերյալ առաջարկներ էր ներկայացրել, ուստի Էդմոն Մարուքյանը հորդորեց Դավիթ Հարությունյանին հրապարակավ ասել, թե ինչու, ինչ պատճառաբանությամբ են մերժում իրենց առաջարկները՝ կառավարության կառուցվածքի հետ կապված:
Դավիթ Հարությունյանը պատասխանեց՝ դուք առաջարկում եք վերադասավորել կառավարությունը՝ ներկայացնելով կառավարության մեկ այլ կառուցվածք. «Սա քաղաքական որոշման խնդիր է, եւ յուրաքանչյուր կառավարություն ինքն է առաջարկում այն կառուցվածքը, որը իր կարծիքով լավագույնս կնպաստի իր կողմից նշված խնդիրների լուծման համար: Մենք, դիտարկելով մեր կադրային ռեսուրսները, դիտարկել ենք այսպիսի կառուցվածք: Վստահ եմ, եթե մի օր լինի իշխանության մեկ այլ քաղաքական ուժ, նա եւս կներկայացնի իր տեսլականը այդ առումով: Սա ամենեւին չի նշանակում, որ այս կառուցվածքը կարծրացած է»:
«Ելքը» առաջարկել էր նաեւ հրապարակել ոստիկանության զորքերի թիվը: Դավիթ Հարությունյանն ասաց. «Շատ վտանգավոր բան եք առաջարկում, որովհետեւ ոստիկանության զորքերը մտնում են մեր ընդհանուր զորքերի մեջ, այդ զորքերը կարող են ներգրավված լինել ՀՀ պաշտպանության գործում եւ ստիպել օրենքով հրապարակել մի տեղեկատվություն, որը մեր հակառակորդը սիրով կընդունի: Ես կարծում եմ, լավագույն ծառայությունը չեք մատուցում ՀՀ-ին այս առումով»:
Էդմոն Մարուքյանը վիրավորված արձագանքեց. «Պարոն Հարությունյան, ձեր մեղադրանքը, թե ում ենք ծառայություն մատուցում՝ մենք ծառայում ենք Հայաստանի Հանրապետության քաղաքացիներին: Իսկ ոստիկանության վերաբերյալ մեր առաջարկը՝ թե՛ բերելու կառավարության կազմ, թե՛ թվաքանակը հրապարակելու, միտված է Հայաստանը ոստիկանական երկիր չդարձնելուն: Միտված է նրան, որ մենք իմանանք մեր բնակչության մեկ թվին ընկնող ոստիկանների թիվը, ինչը միջազգային չափանիշներով խախտված է եւ դրա մասին բազմաթիվ հրապարակումներ կան, այ սրա համար ենք առաջարկել: Կարող եք մերժել առաջարկը, բայց ասել, որ մենք թշնամիներին…նամյոկ անել, ասել, որ մենք ծառայություն ենք մատուցում թշնամիներին, կարծում եմ, կոռեկտ մեկնաբանություն չի ձեր կողմից, նաեւ վիրավորական է»:
Դավիթ Հարությունյանն արձագանքեց. «Շատ հաճախ բարի նպատակներով է սալապատված դժոխքի ճանապարհը»:
Հռիփսիմե ՋԵԲԵՋՅԱՆ
