«Կառավարության կառուցվածքի եւ գործունեության մասին օրենքը» եւ կից ներկայացված տասնյակ օրենքներն այսօր ԱԺ արտահերթ նիստում երկրորդ ընթերցմամբ քննարկվեց:
Արդարադատության փոխնախարար Դավիթ Հարությունյանը, որը հիմնական զեկուցողն էր հարցի, անդրադարձավ այն փոփոխություններին, որոնք երեկվանից դարձել են բուռն քննարկման եւ քննադատության առարկա:
Ինչպես երեկ տեղեկացրել էինք, Երեւանի ավագանու նիստերը լուսաբանման համար դառնում են որոշակիորեն սահմանափակ, այսինքն, լրագրողները այլեւս չեն մասնակցելու նիստերին, միայն հետեւելու են ուղիղ հեռարձակմամբ:
Դավիթ Հարությունյանի խոսքով՝ Ազգային ժողովի պես է դառնում. «Կարծում ենք, շատ ավելի արդյունավետ է, որովհետեւ յուրաքանչյուր վայրկյան այստեղ մեր աշխատանքը չեն խոչընդոտում լրագրողները: Այն, որ այս պահին ուղիղ հեռարձակում է իրականացվում կից սրահում եւ հնարավորություն կա ոչ միայն տեսնել, այլեւ ձայնագրել, կարծում եմ, իրենց շատ ավելի մեծ հնարավորություն է ստեղծվում պատշաճ աշխատել: Մենք իրենց չենք խանգարում, իրենք մեզ չեն խանգարում: Նույն դրույթը տեղ է գտել Երեւանի քաղաքապետարանի ավագանու նիստերի համար»:
Հռիփսիմե ՋԵԲԵՋՅԱՆ
