Կինոգետներ, ուսանողներ, ռեժիսորներ, իրենց գործի «մաեստրոներ» Կինոյի տան փոքր դահլիճում հավաքվել էին դիտելու Վիգեն Չալդրանյանի «Մաեստրո» ֆիլմը: Ռեժիսորի խոսքով՝ իր բոլոր նկարահանած ֆիլմերից ամենադժվար ճակատագիրը բաժին է հասել այս մեկին՝ վերամոնտաժել, հատվածներ կտրել: Դրդապատճառը նա տեսնում է մի բանում՝ քաղաքականացրել են: Ֆիլմը դիտողներին հորդորեց՝ մի նայեք ֆիլմը քաղաքականության տեսանկյունից:
Ֆիլմի հերոսը կոնսերվատորիայի դասախոս է, որը քաղաքական իրադարձությունների թոհուբոհում ակամա դառնում է խոցելի: «Ես հպարտ եմ, որ համարձակություն ունեցա իմ կուտակումը տալ էկրանին «Մաեստրո» վերնագրով»,- կինոդիտման սկզբում ասաց ռեժիսոր Վիգեն Չալդրանյանը։
Ֆիլմի դիտումից հետո քննարկման ընթացքում ռեժիսորը նշեց՝ բացառությամբ իր վերջին ֆիլմի, մնացած ֆիլմերը երևակայության արդյունք են։ Իսկ «Մաեստրո» ֆիլմի համար ասաց, որ այն իր իրական կյանքի նստվածքի արտացոլումն է, իր կուտակումները։
Ֆիլմի գլխավոր հերոս Միքայել Պողոսյանը քննարկման ընթացքում ասաց, որ ամեն անգամ նայելով ֆիլմը ցավ է ապրում, և վախենում, որ մարտի 1-յան նման պատմություն ևս մեկ անգամ կկրկնվի ժողովրդի կյանքում։
«Այս դերակատարումը ինձ համար շատ ճակատագրական է, քանզի ես կարծում եմ, որ մասեստրոները մեր Երևանում ամենուր են»,-նշեց դերասանը՝ հավելելով որ այս իրականությունը կա ու դեռ շարունակվում է ։
Կարինե ԿԻՐԱԿՈՍՅԱՆ
