Ինչպես Երեւանում, այնպես էլ պատմական եւ մշակութային հուշարձաններով գերառատ Հռոմում ամեն քայլափոխի շինարարություն է գնում, սակայն ոչ մի տեղ գրված չէ` «ավելի բարեկարգ Հռոմ»: Հռոմում եւս անընդհատ վերանորոգվում է որեւէ շինություն կամ մետրոյի նոր կայարան է կառուցվում, սակայն ոչինչ չի արվում հինը ոչնչացնելու հաշվին: Օրինակ՝ Կոլիզեյում տանող ճանապարհին:
Մետրոյի նոր կայարանի շինարարությունը ստիպված դադարեցվել է, եւ շինարարները դիմել են հնագետների օգնությանը, քանի որ 20 մետր խորությամբ փորելով՝ բացառիկ գտածոներ են հայտնաբերվել: Փաստորեն, մետրոյի օդափոխության հորի կառուցման աշխատանքների շնորհիվ բացահայտվել է պատմական շերտը եւ սկիզբ դրվել նոր պեղումների: Մասնագետների գնահատմամբ՝ գտնվել է Հռոմի ամենահին ջրատարը, որը թվագրվում է մ.թ.ա. 312 թվականով: Ի դեպ, շինարարության պատճառով ծածկված հատվածում գտնվում են նաեւ հայտնի հնագույն քարտեզները, որտեղ Հայաստանը հսկայական տարածքով է պատկերված, որի առիթով մեր հարեւանները, չգիտես ինչու, աղմուկ էին բարձրացրել: Ցավոք, հնագույն քարտեզները հնարավոր չեղավ տեսնել` շինարարության պատճառով:
«Առավոտ»
22.03.2018
