Կամ՝ Մարիինյան թատրոնի «հայկական հետքը»
Բոլոր ժամանակներում հայ արվեստագետները համաշխարհային մշակույթի տարբեր ոլորտներում իրենց հետքն են թողել: Մինչ օրս էլ այդ առիթով տարբեր փաստեր են ի հայտ գալիս: «Առավոտի» հետ զրույցներում ճանաչված տենոր Գեղամ Գրիգորյանն, օրինակ, երբեւէ չի ակնարկել այն մասին, թե ինքը տարիներ շարունակ Մարիինյան թատրոնի խաղացանկային՝ Վերդիի «Ճակատագրի ուժը» օպերային ներկայացման մեջ միակ անփոխարինելի Դոն Ալվարոն էր: Պարզվում է՝ հայ տենորից հետո այդ դերերգով մոտ 15 տարի հանդես է եկել մեկ այլ երգիչ՝ ազգությամբ հրեա Ավգուստ Ամոնովը, որի մասին ասում են, թե նա «սեփականաշնորհել» էր այդ դերերգը: Բայց այդ ընթացքում մեկ-երկու փորձ եղել է, ուղիղ ասած՝ երգիչները «տապալվել» են, որոնց փրկել է հենց ինքը՝ Ամոնովը՝ շարունակելով ու ավարտին հասցնելով դերերգը: Իսկ թե ինչո՞ւ է այն անհասանելի նույնիսկ ճանաչված երգիչներին, պարզվում է, որ «Ճակատագրի ուժը» օպերայի երկրորդ գործողությունում Վերդին մի մեծ դուետ է գրել տենորի եւ բարիտոնի համար, ինչին հաջորդում է տենորի հայտնի արիա-ստրետան: Իսկ դա աշխարհում կատարվում է միայն Մարիինյան թատրոնում:
Հովհաննես Այվազյանն ու Մարիա Գուլեգինան «Ճակատագրի ուժը» օպերայում:
Այս մասին «Առավոտին» հայտնեց Ազգային օպերային թատրոնի մեներգիչ, ՀՀ վաստակավոր արտիստ Հովհաննես Այվազյանը, որը վերջերս Մարիինյան թատրոնում հանդես է եկել Դոն Ալվարոյի դերերգով:
Հայ տենորն ու Ռոման Բուրդենկոն:
Մեր զրուցակիցն ընդգծեց, որ «Ճակատագրի ուժը» օպերան Վերդիի միակ մասշտաբային ստեղծագործությունն է, որը կոմպոզիտորը գրել է հատուկ հենց այս ռուսական թատրոնի պատվերով, համաշխարհային պրեմիերան էլ կայացել է 1862թ.:
Մեր զրուցակիցն ասաց, որ 2017թ. սեպտեմբերին այդ թատրոնի մեներգիչների ղեկավարն իրեն առաջարկել է Դոն Ալվարոյի դերերգը, իսկ արդեն նոյեմբերին ինքը բարձրացել է բեմ: Հարցին՝ իսկ ո՞վ էր հանդես գալիս բարիտոնի համար գրված դերերգով, արվեստագետն ասաց, որ Ռոման Բուրդենկոն: Հետո էլ հավելեց, որ Դոննա Լեոնորայի դերերգով ներկայացել է համաշխարհային օպերային աստղ Մարիա Գուլեգինան:
Հետաքրքրությանը՝ պրեմիերային եւ օրերս կայացած ներկայացումից հետո ի՞նչ արձագանքներ եղան, Հովհաննես Այվազյանը պատասխանեց. «Հենց երկրորդ գործողությունից հետո խաղընկերներս հերթով գալիս էին հարդարման սենյակ շնորհավորելու…»: Ասաց նաեւ, թե բեմադրության ռեժիսորն է Էլայջա Մոշինսկին, դիրիժորը՝ Քրիստիան Քնապպը:
Դոն Ալվարոյի կերպարում:
Հայ արվեստագետը Մարիինյանում զբաղված է նաեւ խաղացանկային այլ ներկայացումներում նույնպես, այդ թվում՝ Պուչինի՝ «Տոսկա» (Մարիո Կավարադոս), Վերդի՝ «Աիդա» (Ռադամես), «Դոն Կառլո» (համանուն դերերգ), «Տրուբադուր» (Մանրիկո), Լեոնկավալո՝ «Պայացներ» (Կանիո):
Հետաքրքրությանը՝ հավանաբար զբաղված է օպերային թատրոնում սկսված Բիզեի «Կարմեն» օպերայի նոր կամ Մասսնեի «Մանոնի» բեմադրական աշխատանքներով, մեր զրուցակիցն ափսոսանք հայտնեց, որ վաղօրոք կազմված հյուրախաղային գրաֆիկի պատճառով ներգրավված չէ: Հավելեց նաեւ, թե օրերս մեկնում է Սեուլի օպերային թատրոն, որտեղ հանդես կգա Ռադամեսի դերերգով:
ՍԱՄՎԵԼ ԴԱՆԻԵԼՅԱՆ
«Առավոտ»
22.03.2018
