Մարտի 23-ին «Բյուրոկրատ» գրախանութում կկայանա Tatron-drama.am կայքի շնորհանդեսը: Ինչպես նշեց նախագծի հիմնադիր եւ խմբագիր Կարինե Խոդիկյանը, նախագծի նպատակն է մեկ ընդհանուր հարթակ բերել դասական ու արդի դրամատուրգիան և Հայաստանում գործող թատրոնները, ստեղծել բարենպաստ պայմաններ՝ ազգային թատրոնի և ազգային դրամատուրգիայի փոխհամագործակցության համար, ինչպես նաեւ տեսական հոդվածների, հրապարակումների միջոցով ներկայացնել արդի թատերական կյանքի հիմնախնդիրները և հետագա զարգացման միտումները:
Կարինե Խոդիկյանի ձեւակերպմամբ, նպատակ ունեն ընդհանուր հարթակ ստեղծելով բեմադրիչների և թատերագիրների համար, նպաստել երկուստեք ստեղծագործական փոխադարձ հետաքրքրությանը և հետագա համագործակցությանը: Կայքում ստեղծված պիեսների շտեմարանը կօգնի բեմադրիչներին՝ գտնել իրենց հետաքրքրող ստեղծագործությունը:
Կայքը կունենա հետեւյալ էջերը` լրահոս, թատրոն, դրամատուրգիա, պատկերասրահ, տեսասրահ եւ այլն: Նախատեսվում է նաեւ «Դիմանկար» ենթաէջը՝ նվիրված հայ թատրոնի նվիրյալներին:
Tatron-drama.am-ն կգործի հայերեն և ռուսերեն, հետագայում կունենա նաև անգլերեն տարբերակ:
Գոհար ՀԱԿՈԲՅԱՆ
