Սարիթաղցի. «Կարմիր բերետավորները մարդկանց գցել են գետնին ու տշել. երեւի շանն այդպես չէին խփի»

Դատավոր Աննա Դանիբեկյանի նախագահությամբ այսօր Սարի թաղի բնակիչներ Կարեն Վանոյանի եւ Սարգիս Արաբաջյանի գործով հերթական դատական նիստն էր: Նրանք մեղադրվում են ՊՊԾ գնդի գրավումից հետո, մասնավորապես՝ հուլիսի 19-ին, Սարի թաղում միջադեպի ժամանակ ոստիկանների հանդեպ բռնություն գործադրելու մեջ:

Հիշեցնենք՝ մի քանի օր շարունակ Սարի թաղում ջուր, տրանսպորտ ու գազ չի եղել, դեպի Խորենացի փողոց՝ ՊՊԾ գնդի կողմ տանող ճանապարհն էլ փակ է եղել (տարածքը գրավված էր «Սասնա ծռեր» զինված խմբի կողմից), ինչի պատճառով բնակիչները դուրս էին եկել փողոց բողոքելու: Այս գործով մեղադրյալներ են մոտ մեկ տասնյակ քաղաքացիներ:

Այսօրվա նիստում որպես վկա հարցաքննվեց Արմեն Առուշանյանը: Նա դատարանին հայտնեց, որ դեպքի օրը, ինչպես եւ այժմ, ծառայում է Ոստիկանությունում: «Ձայներ լսեցինք, մոտեցանք այն հատվածին, որը փակել էին ոստիկանները: Վերջիններիս ու բնակիչների, հիմնականում՝ երիտասարդների միջեւ բախում էր տեղի ունենում: Պահանջում էին ճանապարհը բացել, ոստիկաններն էլ ասում էին՝ հնարավոր չէ, որովհետեւ անվտանգություն են ապահովում: Երիտասարդները քարերով խփում էին, հարվածում ոստիկաններին»,-պատմեց Արմեն Առուշանյանը:

Մեղադրող-դատախազ Գեւորգ Գեւորգյանը հետաքրքրվեց՝ քաղաքացիների վրայից ալկոհոլի հոտ առե՞լ է: Վկան պատասխանեց. «Ալկոհոլի հոտ չեմ առել, բայց նորմալ՝ սթափ մարդն իրեն դժվար թե այդպես պահեր: Իմ կարծիքով՝ սթափ չէին»:

Ոստիկանի խոսքով՝ սարիթաղցիները նաեւ սպառնալիքներ են հնչեցրել ոստիկանների հասցեին՝ ասելով՝ «Կսպանենք, կվառենք»:

Սա լսելով մեղադրյալներից Կարեն Վանոյանը տեղից խոսեց՝ հեգնելով ոստիկանին. «Կմորթենք, չէ՞, է՞լ ինչ»: Առանց դատավորի թույլտվության խոսելու համար նա նախազգուշացում ստացավ:

Մեղադրյալների շահերի պաշտպան Լիպարիտ Սիմոնյանը վկային հարցրեց՝ «տեսե՞լ եք, որ ոստիկանները մի քաղաքացու գցել են գետնին ու ծեծում են»: Արմեն Առուշանյանը պատասխանեց, որ չի հիշում:

Ապա Կարեն Վանոյանը, դիմելով վկա-ոստիկանին, հայտարարություն արեց. «Ձեր կողմից քաղաքացիական հագուստով ոստիկաններն են դեպքը հրահրել: Քառասուն հոգի մի կողմից եկան, 30 հոգի՝ մյուս կողմից: Կարմիր բերետավորները եկան, մարդկանց գցին գետնին ու սկսեցին տշել: Երեւի շանն այդպես չէին խփի: Ինձ ոստիկանը խփել է, ընկել եմ գետնին, ձեռքիս վրա 20 սանտիմետրանոց վերք է բացվել»:

Լուիզա ՍՈՒՔԻԱՍՅԱՆ