«Էխո Մոսկվի» ռադիոկայանը, ՌԲԿ մեդիահոլդինգը և Дождь հեռուստաալիքը որոշել են հետ կանչել իրենց լրագրողներին Պետդումայից: Նման որոշում ընդունվել է այն բանից հետո, երբ Պետդումայի էթիկայի հանձնաժողովը խախտումներ չհայտնաբերեց պատգամավոր Լեոնիդ Սլուցկիի գործողություններում, որին լրագրողները մեղադրում էին ոտնձգությունների մեջ, հաղորդում է BBC-ն:
««Էխո Մոսկվին» Պետական դուման համարում է ոչ անվտանգ վայր իր երկու սեռերի լրագրողների աշխատանքի համար (ով գիտի՝ ինչ հակումներ ունեն պատգամավորները), և համաձայն Պետդումայի խոսնակ Վյաչեսլավ Վոլոդինի առաջարկի՝ հետ ենք կանչում մեր լրագրողներին Պետդումայից»,- գրել է «Էխո Մոսկվիի» գլխավոր խմբագիր Ալեքսեյ Վենեդիկտովը Telegram-ի իր էջում:
Դեռ մարտի 7-ին Վոլոդինը Պետդումայում աշխատող լրագրողներին ասել էր. «Վտանգավո՞ր է աշխատել Դումայում: Եթե այո՝ փոխեք ձեր աշխատանքը»:
Հանձնաժողովի որոշումը մեկնաբանել է նաև «Կոմերսանտ» թերթը: Խմբագրության հայտարարության մեջ ասվում է, որ հրատարակության աշխատակիցներին զարմացրել և հիասթափեցրել է Պետդումայի էթիկայի հանձնաժողովի որոշումը և իրենք այլևս որպես նյուզմեյքեր չեն դիմի Սլուցկիին:
Պատրաստեց՝ Վիկտորյա ԱՆԴՐԵԱՍՅԱՆԸ
