Մարտի 21-ին Մերձմոսկովյան Վոլոկոլամսկ քաղաքում թունավորման ախտանշանով շտապ հիվանդանոց է տեղափոխվել 23 դպրոցական երեխա, ինչը հարուցել է ծնողների զայրույթը և փողոցային բախումների պատճառ է դարձել, գրում է Meduza.io-ն:
Սկզբնապես հաղորդվում էր, որ հիվանդանոց տեղափոխված երեխաները թունավորվել են դպրոցում գազի բալոնի արտահոսքի հետևանքով, սակայն ավելի ուշ պարզվել է, որ թունավորման պատճառը քաղաքից մի քանի կիլոմետր հեռավորության վրա գտնվող «Յադրովո» կենցաղային թափոնների աղբակույտում գազի արտանետումներն են:
Ավելի ուշ Մոսկվայի մարզի առողջապահության նախարար Դմիտրի Մարկովը հայտարարել է, որ հիվանդանոց է տեղափոխվել ևս 34 երեխա 3 դպրոցներից, նրանք բոլորը գանգատվել են գլխապտույտից և սրտխառնոցից:
Երեխաներին հիվանդանոց են տեղափոխել շտապ օգնության մեքենաններով՝ ծանր վիճակով: Հիվանդանոցի ընդունարանում հավաքված ծնողները բժիշկներից պահանջել են հստակ ախտորոշում տալ:
Հիվանդանոցի մոտ ինքնաբուխ ցույց է սկսվել, երբ այստեղ է ժամանել Մերձմոսկվայի նահանգապետ Անդրեյ Վորոբյովը և շրջանի ղեկավար Եվգենի Գավրիլովը: Հավաքվածները նրանց դիմավորել են «ամոթ», «մարդասպաններ», «հրաժարական» բացականչություններով, շրջափակել են Գավրիլովին և պատասխանատվության հրավիրել, տեղի է ունեցել բախում:
Պատրաստեց՝ Վիկտորյա ԱՆԴՐԵԱՍՅԱՆԸ
