55-ամյա Սայադ Խուդոյանը մեկն է նրանցից, ով իրեն ներկայացնել չի սիրում, ով կենսագրություն, անցյալ ունի եւ ում առաջ դռները փակում են առանց պատճառաբանելու՝ ինչո՞ւ:
Անցյալ տարվա նոյեմբերի 17-ին նա իր առողջական խնդիրների պատճառով դիմել էր ընկերությանը, որպեսզի ազատվի աշխատանքից:
Իսկ աշխատում էր «Սանիթեք» ընկերությունում (տնօրեն՝ Նիկոլաս Էլ Թավիլ), որպես հավաքարար: Նրա մոտ խոցային հիվանդությունն էր բուն դրել, գիշերային աշխատանքի ժամանակ մի քանի անգամ շտապօգնություն են կանչել:
Ազատեցին աշխատանքից, սակայն աշխատանքային գրքույկում նշված էր ազատման օրը՝ նոյեմբերի 27:
Սայադ Խուդոյանն այդ մասին իմացել է այս տարվա փետրվարին, երբ արդեն դիմել էր «Առավոտի» խմբագրություն, որպեսզի օգնենք իրեն ստանալու համար իր աշխատանքային գրքույկը:
Նրան որեւէ մեկը թույլ չէր տալիս մտնել ընկերության վարչական տարածք:
Ի վերջո, փետրվարի վերջերին ստանում է իր աշխատանքային գրքույկը եւս:
Սայադի աշխատավարձը կազմել է 85 000 դրամ: Ազատման օրվանից մինչ օրս նրա աշխատավարձը չեն տալիս, ասելով՝ «գումար կլինի՝ կտան»:
Նա բնակվում է վարձով, նրան անհրաժեշտ են դեղեր, նա Ամանորը անցկացրել է առանց մի լումա գրպանում ունենալու:
Զրուցակիցս «Մալաթիա» ջոկատի կազմում կռվել է Աղդամում:
Պաշտպանության նախարար Վազգեն Սարգսյանի կողմից 1997թ. սեպտեմբերի 21-ին պարգեւատրվել է «1992-94թթ. մարտական գործողությունների մասնակցի» կրծքանշանով:
Ռ. Մ.
«Առավոտ»
21.03.2018
