«Տրամաբանորեն, մարդկային լեզվով կարո՞ղ եք բացատրել՝ ինչպե՞ս է լինում, որ գազը աշխարհի մեկ վեցերորդ մասով գալիս հասնում է 150 դոլար, իսկ մարդկանց հաշվիչի մեջ մտնում է 290 դոլար, մարդիկ չեն հասկանում՝ ինչպե՞ս է լինում այդքան տարբերություն»,- այսօր ԱԺ-ում «Ելք» խմբակցության հարցապնդման պատասխանի քննարկման ժամանակ այսպիսի հարց ուղղեց «Ելքի» պատգամավոր Արտակ Զեյնալյանը: Հիշեցնենք, որ հարցապնդումը վերաբերում էր ՀԷՑ-ի եւ «Գազպրոմ Արմենիա» ընկերությունների վերջին 10 տարվա գործունեությանը:
Էներգետիկ ենթակառուցվածքների եւ բնական պաշարների նախարար Աշոտ Մանուկյանը պատասխանեց, որ փոխանցման եւ բաշխման ծախսերը պայմանավորված են նորոգման, շահագործման, պահպանման ծախսերով: «Գազպրոմի» աշխատակազմը 5875 մարդ է, այդ մարդիկ աշխատավարձ են ստանում, կան պահպանման ծախսեր: Դրա մեջ է մտնում պահպանման ծախսերը նաեւ եւ 7.25 տոկոս կորուստները:
Զեյնալյանը հարցրեց՝ այդ գնագոյացումը, սպասարկումը ուրիշ երկրներում էլ կա, բա ուրիշ երկրների հետ համեմատած՝ ինչո՞ւ է ռուսական գազն ուրիշ երկրներում էժան հասնում սպառողի հաշվիչին, մեզ մոտ ավելի թանկ հասնում:
Նա նաեւ հարցրեց գազի կալորիականությունից՝ ո՞վ է ստուգում եւ արդյոք բավարա՞ր անկախություն ունի, որ մարդիկ վստահեն այդ ընկերության ստուգածին:
Նախարարը պատասխանեց, որ երբ ինքը Հրազդանի ՋԷԿ-ում էր, օրը երեք անգամ տարբեր կալորիականության տվյալներ են ստացել եւ դա միանգամայն նորմալ է:
«Ծառուկյան» խմբակցության պատգամավոր Արարատ Զուրաբյանը հետաքրքրվեց արեւային էներգիայից. «Ամպամած Բրիտանիան այսօր 25 տոկոս արեւային էներգիա է օգտագործում, իսկ արեւային Հայաստանը գիտենք ինչպես է օգտագործում: Ես ուզում եմ հասկանալ՝ ինչո՞վ է պայմանավորված, որ ՀՀ-ում մեկ անհատին թույլատրվող արեւային էլեկտրաէներգիայի քանակը սահմանափակվում է, սա ի՞նչ է՝ ֆաշի՞զմ է, թշնամությո՞ւն է մեր հասարակության դեմ, ի՞նչ նպատակ է հետապնդում, եթե մարդիկ պատրաստ են ներդրում անել»:
Աշոտ Մանուկյանը պատասխանեց. «Միանշանակ ճիշտ եք, արեւային էներգիայի աղբյուրները անսպառ են ՀՀ-ում, դրանք անվերջանալի են: Ինչու չենք կառուցում արեւային կայաններ՝ լույսը բացվեց՝ արեւային էներգիա կա, մութն ընկավ՝ չկա: Մեզ մոտ հարց է՝ արեւային կայանները կառուցել խոշո՞ր, թե՞ մանր, այսինքն՝ 50 ՄգՎտ-անո՞ց, թե՞ 5, կառուցել կուտակիչներո՞վ, թե՞ առանց կուտակիչների: Այս հարցերին պատասխանելու համար մենք առաջին կայանը կկառուցենք առաջին ամիսներին, կստանաք պատասխանները»:
Նախարարն ասաց, որ նաեւ պետք է ուսումնասիրեն՝ Արարատյան դաշտում սեւահողերի վրա կառուցե՞ն արեւային կայան, թե՞ ոչ, ճանապարհային հատվածներից մինչեւ 20 մետր հեռավորությունը պահե՞ն, թե՞ ոչ: Նախարարն ասաց, որ առաջիկա տարիներին արեւային կայաններ ստեղծելով՝ մենք ամբողջապես հնարավոր է հրաժարվենք գազային կայանների արտադրած էլեկտրաէներգիայից:
Հռիփսիմե ՋԵԲԵՋՅԱՆ
