Հոգեբուժարաններում հիվանդներին զսպում են ապօրինի միջոցներով, միատեսակ սնունդ են տալիս ու ում շորը պատահի՝ հագցնում

Ռետինե լարաններ, սինթետիկ գործվածքից պատրաստված գոտիներ եւ զսպման մի շարք այլ միջոցներ են այսօր կիրառվում հոգեբուժարաններում, ինչը Մարդու իրավունքների պաշտպանի համոզմամբ՝ օրենքի կոպիտ խախտում է: Պաշպանի գրասենյակի մասնագետները օրեր շարունակ մեր երկրի 10-12 հոգեբուժարաններում ուսումնասիրել են մարդու իրավունքների խնդիրները եւ տասնյակ խախտումներ հայտնաբերել: Այսօր Մարդու իրավունքների պաշտպան Արման Թաթոյանն ասաց, որ իրենց մասնագետները հոգեբուժարաններում հայտնաբերել են օրենքով չնախատեսված զսպման, ներգործության միջոցներ, որոնք կիրառողները պետք է պատասխանատվության ենթարկվեն:

Մանրամասները՝ տեսանյութում

Ըստ պարոն Թաթոյանի, Վարդենիսի, Գյումրու եւ այլ հոգեբուժական կենտրոններում չկան առանձին սենյակներ՝ ֆիզիկական զսպման համար եւ այդ գործողությունները կատարվում են ընդհանուր սենյակներում՝ մյուս հիվանդների աչքի առաջ: ՄԻՊ մասնագետները հոգեբուժարաններում հայտնաբերել են ժամկետանց դեղեր եւ բժշկական պարագաներ, դեղերի ոչ պատշաճ պահպանում:

Արման Թաթոյանն ասաց, որ իրենց աշխատակիցները հիվանդների մոտ գտել են նաեւ այնպիսի դեղեր, որոնցից տեղյակ չի եղել բուժհիմնարկի անձնակազմը, իսկ կողմնակի դեղերի ընդունումը, անգամ ցավազրկող, պաշտպանի խոսքով, հնարավոր է խնդիրներ առաջացնի հոգեմետ դեղորայք ընդունող հիվանդների մոտ:

Պաշտպանի գրասենյակի մասնագետները նաեւ նկատել են, որ մի շարք դեպքերում առկա է հոգեկան առողջության խնդիրներ ունեցող մարդկանց նկատմամբ խտրական մոտեցում: Ըստ Արման Թաթոյանի, հագուստը չի առանձնացվում կոնկրետ հիվանդի համար, ինչը հոգեբուժարանների աշխատակիցները պարզաբանել են հիվանդների անտեղյակությամբ ու չհասկանալով:

Ուսումնասիրությունների ընթացքում արձանագրվել են դեպքեր, երբ կանանց բաժանմունքներում հերթապահում են տղամարդ հսկիչ-սանիտարներ, ինչը պաշտպանի կարծիքով, անթույլատրելի է կանանց նկատմամբ արժանապատվությունը նվաստացնող հնարավոր վերաբերմունքի տեսանկյունից:

Սննդի հետ կապված նույնպես խախտումներ են հայտնաբերվել: Մասնավորապես այն եղել է միատեսակ: Մի շարք հոգեբուժարաններում էլ սենյակները գերբեռնված են:

Հարցին, թե հոգեբուժարաններում խնդիրների լուծումը հիմնականում կապված է ֆինանսակա՞ն միջոցների հետ, պարոն Թաթոյանը պատասխանեց, որ կան խնդիրներ, որոնք ֆինանսական միջոցներ չեն պահանջում:

Արման Թաթոյանն ասաց, որ մի շարք խնդիրների մասով իրենց ձեռքի տակ եղած փաստերը տրամադրել են Գլխավոր դատախազությանը: Խախտումներն արտացոլում են 2017 թվականի վիճակը:

Լուսինե ԲՈՒԴԱՂՅԱՆ