«Սա է ամենակարեւոր մեխը`երկրի նախագահը բոլորի նախագահն է եւ երկրի նախագահը ամբողջ երիտասարդության ներուժն օգտագործելու է երկրի բարօրությանն ուղղելու տեսակետից՝ քաղաքական պատկանելություն եւ կողմնորոշման տարբերություններ չի դնում»,- խորհրդարանում, լրագրողների հետ զրույցում պատասխանելով նախագահ Սերժ Սարգսյանի վերջին հարցազրույցին վերաբերվող հարցին, ասաց ՀՀԿ խմբակցության պատգամավոր Գեւորգ Կոստանյանը:
Հիշեցնենք, իր հարցազրույցում Սերժ Սարգսյանը խոսել էր լիդերներ պատրաստելու մասին:
«Ես կարծում եմ, որ դա վերաբերում նաեւ նրան, որ այդ թվում մեր հարգարժան գործընկեր Նիկոլ Փաշինյանը, Էդմոն Մարուքյանը, Զեյնալյան Արտակը, բոլոր` թեկուզ քաղաքական ընդդիմություն հանդիսացող, այս երկրի բարօրության համար պայքարող եւ երկրին նվիրված տղաներն ու կանայք օգտագործվելու են: Նրանց ներուժը կիրառվելու է երկրի բարօրության ու զարգացման համար: Այսինքն, դա վերաբերում էր բոլորին՝ անկախ քաղաքական կամ այլ կողմնորոշումից»,- պարզաբանեց Գեւորգ Կոստանյանը:
Հարց հնչեց`ինչո՞ւ է Սերժ Սարգսյանն իրեն վերապահել լիդերներ կրթելու դերը, Գեւորգ Կոստանյանը պատասխանեց. «Բա էլ ո՞վ պետք է նման կոչ աներ, էլ ո՞վ պետք է առաջարկ աներ, եթե ոչ նա»:
Նելլի ԳՐԻԳՈՐՅԱՆ
