Սահմանադրական դատարանը հետաձգել է ՀՀ մարդու իրավունքների պաշտպանի՝ դպրոցական դասագրքերի անվճար տրամադրման հարցի քննությունը:
Aravot.am-ի հարցին՝ ի՞նչ հիմքով է հետաձգվել ՄԻՊ դիմումի հիման վրա գործի դատաքննությունը սկսելու ժամկետը, ՍԴ մամուլի քարտուղար Հովհաննես Պապիկյանը տեղեկացրեց, որ ՍԴ-ն այս մասին ընդունել է աշխատակարգային որոշում:
ՍԴ կայքում տեղադրված որոշման դիմումի քննությունը հետաձգվել է գործով լրացուցիչ ուսումնասիրություններ կատարելու անհրաժեշտությամբ պայմանավորված: ՍԴ աշխատակարգային որոշման մեջ մասնավորապես ամրագրված է. «ՀՀ մարդու իրավունքների պաշտպանի դիմումի հիման վրա` «Կրթության մասին» ՀՀ օրենքի 6-րդ հոդվածի 4-րդ մասի՝ Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործով լրացուցիչ ուսումնասիրություններ կատարելու անհրաժեշտությամբ պայմանավորված գործի դատաքննությունն սկսելու ժամկետը 2018 թվականի մարտի 20-ի ժամը 10.00-ից հետաձգել 2018 թվականի ապրիլի 20-ին, ժամը 12.00-ին»:
Տաթև ՀԱՐՈՒԹՅՈՒՆՅԱՆ
