Մարտի 18-ին Լիբանանում ՀՀ դեսպանության և Հայ Բարեգործական Ընդհանուր Միության Լիբանանի մասնաճյուղի համագործակցությամբ անցկացվեց հուշ-երեկո՝ նվիրված լիբանանահայ հագուստի դիզայներ-ոճաբան Ժան-Պիեռ Դելիֆերին: Միջոցառումն անցկացվում էր Լիբանանում Ֆրանկոֆոնիայի ամսվա շրջանակներում:
Մասնակիցներ Ժան-Լուի Մանգին, Ռոժե Ասսաֆը, Ժերար Ավեդիսյանը, Էթիեն Կուպելյանը, Ղադի Ռահբանին ներկայացրեցին Ժան-Պիեռ Դելիֆերի գործունեությունը և իրենց միջև հաստատված համագործակցության հուշերը:
Միջոցառման հյուրերին ուղղված իր խոսքում Լիբանանում ՀՀ դեսպան Սամվել Մկրտչյանը նշեց, որ Ժան-Պիեռ Դելիֆերն իր ստեղծագործական աշխատանքով նպաստել է ֆրանկոֆոն երկրների՝ Լիբանանի և Ֆրանսիայի, մշակութային փոխառնչությանը. նրա հեղինակած զգեստները ներդաշնակորեն միաձուլում են արևելյան և արևմտյան ոճերը՝ ներկայացնելով ստեղծագործական նոր մոտեցումներ: ՀՀ դեսպանը ներկայացրեց նաև ընթացիկ տարվա հոկտեմբերին Հայաստանի կողմից հյուրընկալվող Ֆրանկոֆոնիայի գագաթաժողովի նախապատրաստական աշխատանքները:
Տեղեկանք․ Ժան-Պիեռ Դելիֆերը ծնվել է Լիբանանում՝ Ադանայից փախստական հայ ընտանիքում: Նա իրավամբ համարվում է արաբական աշխարհի առաջին հագուստի դիզայներ-ոճաբանը: 1954թ. Բեյրութում հիմնել է իր Նորաձևության տունը: Աշխատել է հանրահայտ երգչուհի Ֆեյրուզի հետ: 1975 թվականից մոտ մեկ և կես տասնամյակ ապրել և աշխատել է Փարիզում: Հեղինակել է Ա. Քամյուի պիեսների բեմադրությունների, Մ.Սկորսեզեի ֆիլմերի զգեստները: 1990թ. վերադարձել է Լիբանան: Մահացել է 1999թ.:
ՀՀ ԱԳՆ
