Այսօր ԱԺ հայտարարությունների ժամին «Ծառուկյան» խմբակցության պատգամավոր Լուիզա Սարգսյանը հիշեցրեց, որ այսօր Երջանկության միջազգային օրն է եւ շնորհավորեց պատգմավորներին՝ մաղթելով, որ երջանիկ լինեն եւ լավ ապրեն:
Նա նաեւ ներկայացրեց ՄԱԿ-ի հրապարակած Երջանկության զեկույցը, ըստ որի, առաջին տեղում է Ֆինլանդիան՝ որպես երջանիկ պետություն, 156 երկրներում անցկացված հարցումներով Հայաստանը զբաղեցնում է 129-րդ տեղը, մինչդեռ 2016-ին 121-րդ տեղում էր: Լուիզա Սարգսյանի խոսքով՝ հայաստանյան երջանկությունը 8 նիշով մեկ տարում անկում է ապրել: Ի հեճուկս դրա, Ադրբեջանը երջանկության ցուցանիշով 87-րդ տեղում է: Մենք ավելի շատ Կոնգոյի, Զիմբաբվեի, Սուդանի շարքերում ենք, միայն նրանց ենք զիջում:
Նա ասաց, որ ՀՀ քաղաքացիները իրենց երջանկության բանալին փնտրում են օտար երկրներում, լուռ արտագաղթում են:
ԱԺ փոխխոսնակ Էդուարդ Շարմազանովը հորդորեց Լուիզա Սարգսյանին, որ վերջում ժպտա գոնե ու ԱԺ դահլիճում երջանկության մթնոլորտ ստեղծի. «Ժպտացեք, կանայք, ժպտացե՛ք»:
«Ծառուկյան» խմբակցության պատգամավոր Գեւորգ Պետրոսյանն ասաց, թե ինչ է երջանկությունը, իր կարծիքով. «Ամենամեծ երջանկությունը քաղաքացիների՝ իրենց հայրենիքում ապահով եւ հարգված ապրելու ունակությունն է»:
Իսկ Շարմազանովը հակադարձեց՝ «Ամենամեծ երջանկությունն է, որ յուրաքանչյուր մարդ իր խղճի հետ հաշտ ու համերաշխ ապրի»:
Հռիփսիմե ՋԵԲԵՋՅԱՆ
