Դատավոր Վարդան Գրիգորյանի նախագահությամբ այսօր քաղաքական գործիչ Անդրիաս Ղուկասյանի գործով հերթական դատական նիստն էր: Հիշեցնենք՝ նա մեղադրվում է 2016թ. հուլիսի 29-ին զանգվածային անկարգություններ կազմակերպելու եւ ոստիկանության ՊՊԾ գունդը գրաված ու մի շարք ծանր հանցագործությունների համար մեղադրվող «Սասնա ծռեր» զինված խմբին օժանդակելու համար:
Երբ Ղուկասյանը բերվեց նիստերի դահլիճ, հարազատներից տեղեկացավ, որ այսօր Ժիրայր Սեֆիլյանը դատապարտվել է 10 տարի 6 ամսվա ազատազրկման: «Փաստորեն, 11 տարուց կես տարին հանել են»,-հեգնեց Անդրիաս Ղուկասյանը՝ նկատի ունենալով այն, որ մեղադրող-դատախազ Պետրոս Պետրոսյանը մինչեւ դատավճիռը միջնորդել էր Սեֆիլյանին ազատազրկել 11 տարով:
Պետրոս Պետրոսյանը, որը Ղուկասյանի գործով եւս մեղադրող-դատախազն է, նիստին չէր եկել: Նա դատարանին տեղեկացրել էր, որ աշխատանքային ծանրաբեռնվածության պատճառով ներկայանալ չի կարող: Այդ պատճառով էլ Ղուկասյանի գործով տուժողների հարցաքննությունն այսօր չկայացավ. նիստը հետաձգվեց մեկ շաբաթով:
Հիշեցնենք, որ Պետրոս Պետրոսյանը մինչեւ Անդրիաս Ղուկասյանի գործով նիստը Ժիրայր Սեֆիլյանի դատավճռի հրապարակմանն էր ներկա, որտեղ միջադեպ տեղի ունեցավ:
Լուիզա ՍՈՒՔԻԱՍՅԱՆ
