«Սպասելի էր այս դատավճիռը, պարզ էր, որ այսպես կվարվեն, բայց իմ որդին անմեղ է: Ոչ մի հիմք չկար նրան մեղադրելու, այդ մասին բոլորը գիտեն: Անգամ այլ երկրներում են Գեւորգի անունը տալիս ու ասում, որ նա անմեղ է»,-«Ժիրայր Սեֆիլյանի եւ մյուսների գործով» դատավճռի հրապարակումից հետո այսօր լրագրողների հետ զրույցում ասաց Գեւորգ Սաֆարյանի մայրը՝ Շուշան Բերբերյանը:
Հիշեցնենք, որ Սաֆարյանն այս գործով մեղավոր ճանաչվեց զանգվածային անկարգություններ ծրագրելու եւ դրա իրականացմանը միտված գործողություններ նախապատրաստելու համար` դատապարտվելով 5 տարի եւ 5 ամսվա ազատազրկման: Նրա պատժի չափին գումարվեց նաեւ «Տոնածառի գործով» դատավճռի չափը:
«Սա քաղաքական հետապնդում է: Չգիտես ինչու՝ իշխանություններն այդ աստիճանի վախի մեջ են: Նրանք այսքա՜ն անմեղ քաղբանտարկյալներ ունեն: Գեւորգը չպետք է ճաղերի հետեւում հայտնվեր»,-համոզմունք հայտնեց Շուշան Բերբերյանը:
Լուիզա ՍՈՒՔԻԱՍՅԱՆ
