Ինչպես ավելի վաղ հայտնել էինք, Շուշիի առանձնակի գումարտակի հրամանատար Ժիրայր Սեֆիլյանն այսօր դատապարտվեց 10 տարի եւ 6 ամսվա ազատազրկման: «Նա երեք հոդվածներով մեղավոր ճանաչվեց՝ այն դեպքում, երբ ապացույցներ չկային: Սա քաղաքական պատվեր է եւ հաշվեհարդար: Մարտի 20-ը պետք է նշվի որպես արդարադատության մահվան օր: Դատարանների շենքերին ծածանվող դրոշն այս օրը պետք է իջեցնել եւ փոխարենը սեւ ժապավեն փակցնել»,-լրագրողների հետ զրույցում դատավճռին այսպիսի գնահատական տվեց Սեֆիլյանի շահերի պաշտպաններից Արայիկ Պապիկյանը:
Նրա գնահատմամբ՝ կգա ժամանակ, երբ քաղաքական իշխանությունը պատասխան կտա այս դատավճռի համար: «Մեղադրանքում մոռացել են նշել Քենեդու սպանության մասին հոդվածը: Մյուս հոդվածներն էլ էին նույն ժանրից, այսինքն՝ ֆանտաստիկա…ուղղակի նրան պետք է ազատազրկեին՝ լռեցնելու համար, որովհետեւ նա լուրջ վտանգ էր ներկայացնում ներկայիս իշխանական վարչախմբի համար»,-հեգնեց Արայիկ Պապիկյանը:
Նա հայտնեց, որ դատավճիռը բողոքարկելու են, բայց, փաստաբանի խոսքով, անկախ դատական համակարգ չկա, ուստի Վերաքննիչ քրեական դատարանը ձեւական ընթացակարգով է քննելու իրենց բողոքը:
«Այս դատավճիռը խայտառակություն է եւ իր տեսակով արտառոց: Հենց սկզբից ապացույցները կեղծված էին: Իշխանությունները կարծես սրանով ասացին, որ իրենց դեմ խաղ չկա»,-իր հերթին համոզմունք հայտնեց Սեֆիլյանի շահերի մյուս պաշտպան Տիգրան Հայրապետյանը:
Լուիզա ՍՈՒՔԻԱՍՅԱՆ
Լուսանկարում՝ Ժիրայր Սեֆիլյանն ու Արայիկ Պապիկյանը
