Ապրիլի 9-ից ավարտվում է Սերժ Սարգսյանի երկրորդ պաշտոնավարման ժամկետը եւ ընդդիմությունը մտավախություն ունի, որ նախագահ Սերժ Սարգսյանը կփորձի իր իշխանությունը պահպանել՝ վարչապետի պաշտոնը ստանձնելով: Եվրոպական պետության համար սա մտահոգության առիթ չէ՞, Հայաստանը այդ դեպքում դարձյա՞լ վստահելի եւ ժողովրդավար պետություն կդիտվի: Այսօր այս հարցը լրագրողներն ուղղեցին Լեհաստանի Սենատի Արտաքին հարաբերությունների և Եվրոպական միության հետ կապերի կոմիտեի նախագահ Մարեկ Ռոցկիին:
Նա պատասխանեց. «Յուրաքանչյուր պետություն իրավունք ունի ինքնուրույն ու յուրովի կառուցելու իր քաղաքական դաշտը: Շատ հաճախ ամենուրեք այդպես է, եթե արմատական փոփոխություններ են իրականացվում, դրանք, բնականաբար, բուռն քննարկումների են արժանանում: Եթե ներկայիս կառավարման մոդելը քաղաքացիների սպասելիքները չարդարացնի, ապա հաջորդ անգամ դուք հնարավորություն կունենաք փոխելու»:
Նրա խոսքով՝ «Ժողովրդավարության հիմնական գործոնը կայանում է նրանում, որ քաղաքացին պետք է կարողանա ներկայացնել իր կամքը, իսկ քաղաքական գործիչները պետք է պարզապես իրականացնեն նրանց սպասելիքները: Աշխատանքային քննարկումների ընթացքում խոսվեց նաեւ այդ տրանսֆորմացիայի մասին»:
Հռիփսիմե ՋԵԲԵՋՅԱՆ
