«Սասնա ծռերի» դատավարության մասին զեկույցի քննարկման ժամանակ այսօր թեժ բանավեճ ծավալվեց Lakmoes.am կայքի խմբագիր Էլմիրա Մարտիրոսյանի եւ ՀՀ փաստաբանների պալատի իրավական հարցերով փորձագետ Արտաշես Խալաթյանի միջեւ: Էլմիրա Մարտիրոսյանը հայտարարեց, որ Փաստաբանների պալատն ԱԱԾ-ի եւ Քննչական կոմիտեի շահերը սպասարկող փաստաբաններ ունի, Արտաշես Խալաթյանն էլ պահանջեց անուններ հնչեցնել:
-Հետեւեք հրապարակումներին, կիմանաք,-ասաց Էլմիրա Մարտիրոսյանը:
-Անուններ տվեք, առանց տեսախցիկի կարո՞ղ եք ասել,-հարցադրումը կրկնեց Խալաթյանը:
-Հետեւեք հրապարակումներին…
-Եթե ձեզ թվում է, թե մենք պետք է ամբողջ օրը ձեր կայքին հետեւենք, սխալվում եք: Կարո՞ղ եք անուն ասել, մենք զբաղվենք: Ես էլ կարող եմ այդպես «օդի մեջ» ասել, թե ձեր կայքն ում է պատկանում…
-Չեք կարող ասել, մենք հանրության շահերն ենք ներկայացնում:
Անուններ, ի վերջո, այդպես էլ չհնչեցին: Արտաշես Խալաթյանը շեշտեց, որ պետք է անուն հրապարակել, որպեսզի ՓՊ-ն զբաղվի հարցով: Նա որպես օրինակ նշեց, որ վերջերս պալատը կարգապահական վարույթի տեսքով տուգանել է մի փաստաբանի, որը ներկայացրել է ՀՀ Հատուկ քննչական ծառայության շահերը: «Նա հիմա ՀՀ-ում չի, բայց մենք նրան տուգանել ենք, շուտով լիազորագրի դադարեցման հարցը կքննարկվի»,-տեղեկացրեց ՓՊ աշխատակիցը:
Լուիզա ՍՈՒՔԻԱՍՅԱՆ
