Նախկին պատգամավոր, ԱԺ նախագահի խորհրդական
Մկրտիչ Մինասյանը` ներքաղաքական զարգացումների մասին
– «Հանուն Հայաստան պետության» ճակատը Ազատության հրապարակում հանրահավաքային պայքար է սկսել: Հանրահավաքների ինֆորմացիոն առիթն է կանխել Սերժ Սարգսյանի վարչապետ դառնալը: Իսկ առհասարակ, ակցիայի կազմակերպիչները նպատակ ունեն համաժողովրդական ճնշման ներքո համակարգային փոփոխություններ իրականացնել: Հույս ունեն, որ այս գաղափարի շուրջ կկարողանան համախմբել հանրությանն ու քաղաքական ուժերին: Իշխող ՀՀԿ-ին սա չի՞ մտահոգում, մանավանդ Հայաստանում սոցիալական այնպիսի բեւեռացվածություն կա, որ ցանկացած պահի պայթյունը հնարավոր է:
– Ես կարծում եմ, որ մեր երկիրն իսկապես ժողովրդավարական երկիր է, եւ լիարժեքորեն իրացվում են քաղաքացիների իրավունքները: Այլ բան է, որ քաղաքացիներն իրենց առջեւ ոչ իրատեսական խնդիր են դնում: Ինչեւէ, ես հույս ունեմ, որ ակցիաներ իրականացնողներն օրենքի տառը չեն խախտի եւ կմնան օրենքի ու Սահմանադրության դաշտում:
Ինչ վերաբերում է բուն հանրահավաքներին, իմ կարծիքով՝ կրիտիկական մասսայի խնդիր չի լուծվելու: Ես տեսնում եմ, որ մեր ազգային անվտանգության խնդիրները, ոխերիմ հարեւանների հետ մեր հարաբերությունները եւ երկրի զարգացման հեռանկարներով զբաղվող մարդկանց վերաբերմունքը, վերջին տարիներին ձեռնարկված միջոցները բացառելու են այդպիսի կրիտիկական մասսայի ձեւավորումը:
– Ձեր հույսը, փաստորեն, այն է, որ մարդիկ կրիտիկական մասսայով, այնուհանդերձ, փողոց դուրս չե՞ն գա:
– Դա պայմանավորված է ոչ միայն ցանկությամբ կամ վերլուծությամբ: Դա, կարծում եմ, իրատեսական գնահատական է: Ամեն ինչ պետք է համեմատության մեջ դիտարկենք եւ մեր հարեւանների հետ համեմատության: Չի կարելի համեմատվել Դանիայի, Շվեյցարիայի հետ: Իհարկե, կգա ժամանակ, որ այդ երկրների հետ էլ կհամեմատվենք: Բայց հիմա պետք է ընդունենք, որ ժողովրդավարության, մարդու իրավունքների պաշտպանության, տնտեսության զարգացման, ապրելակերպի եւ կենսակերպի առումով, մեր հարեւանների համեմատ, շատ կետերով որոշակի առաջընթաց ունենք: Այս բոլորը մարդկանց հնարավորություն է տալիս ավելի առողջ դատելու, շրջահայաց լինելու եւ ազգին ու պետությանը ձեռնտու ու ոչ ձեռնտու հարցերի մասին մտածելու:
– Հանրահավաքային տարբերակով իշխանությանը հեռացնելու գործընթացին կողմ է նաեւ ընդդիմադիր «Ելք» խմբակցության ղեկավար Նիկոլ Փաշինյանը: «Ելք»-ում թեեւ մոտեցումները տարբեր են, բայց, «Քաղաքացիական պայմանագիր» կուսակցության կողմից հանրահավաքներ ու երթեր անցկացնելու մասին Երեւանի քաղաքապետարան ներկայացրած իրազեկումներից հետո մշակում են համատեղ քայլեր` ինչպես կանխել Սերժ Սարգսյանի վերարտադրությունը: Այսինքն՝ կոնսոլիդացիան քայլ առ քայլ կայանում է: Սա չի՞ մտահոգում:
– Մտահոգում է այնքանով, որքանով իրենք նաեւ ԱԺ ամբիոնից օգտվելու հնարավորություն ունեն: Սա ոչ թե անհանգստացնում է, այլ ավելի զգոն եւ շրջահայաց պետք է լինենք, որ ամեն պարագայում կարողանանք ճշմարիտ քայլեր ձեռնարկել եւ պայմաններ չստեղծենք, որ մարդիկ բորբոքվեն:
– Այդ քայլերը որո՞նք են` բիրտ ուժով ճնշե՞լ:
– Աշխատել: Ես երբեք բիրտ ուժին կողմ չեմ եղել: Ես կողմնակից եմ բանակցությունների, մարդկանց կարծիքը լսելու առաջ քաշված տեսակետներում, եթե ճշմարտություններ կան` քննարկելու եւ դրանց արժանավոր վերաբերվելու: Իսկ եթե կլինեն մարդիկ, որ կոնստրուկտիվ դաշտում չեն գործի, ավանտյուրայի կգնան, օրենքին համապատասխան վերաբերմունքի պետք է արժանանան: Եթե մարդն օրենքը չի խախտում, ոչ մի խնդիր չեմ տեսնում:
– ՀՀԿ-ի իշխանությունը հնարավո՞ր է տապալվի, մանավանդ, որ ըստ տարբեր վերլուծությունների՝ իշխանության վերին ատյաններում իրավահաջորդների բացակայությունը կարող է թուլացնել ՀՀԿ-ին:
– Ես չեմ կարծում, որ իրավահաջորդի բացակայության խնդիր կա: Կա տվյալ բնագավառը կամ ոլորտն առավել արդյունավետ ղեկավարելու հարց: Իհարկե, ինչ-որ ակնարկում եք, ես ընդունում եմ: Այո, երկրի անվտանգության, Արցախի հարցի կարգավորման առումով պետք է, որ շատ ավելի փորձառու, թրծված, ամեն թնջուկներով անցած, քաղաքական լայնախոհությամբ օժտված մարդ լինի: Միաժամանակ, նաեւ պետք է լինեն տնտեսության զարգմացման պատասխանատուներ, քանի որ առանց տնտեսական զարգացման եւ առաջընթացի, այս ամենը դառնում է ընդամենը ցանկություն: Այս երկուսի համատեղման դեպքում մենք կունենանք այն, ինչ պետք է կամ ինչ ուզում ենք:
– Հիմա Դուք էլ հիմնավորեցիք, ամեն օր տարբեր տրամաչափի ՀՀԿ-ականներն էլ հիմնավորում են, թե ինչո՞ւ է պետք, որ Սերժ Սարգսյանը դառնա վարչապետ: Ինչո՞ւ է կուսակցությունը ձգձգում, վարչապետի առաջադրման հարցով «քննարկումները» եւ որոշման կայացումը:
– Ես հիմա ի՞նչ տրամաչափի եմ: Տրամաչափ ասելով մարդկանց գործիք եք դարձնում: Ես կուսակցության քաղխորհրդի անդամ եմ եւ չեմ կարծում, թե լուրջ ազդեցություն ունեմ կուսակցությունում: Կա ավելի բարձր օղակ` ԳՄ-ն, որի անդամները շատ ավելի լայն լիազորություններ եւ քննարկումների դաշտ ունեն:
Ես ասացի իմ կարծիքը եւ իմ կարծիքը հայտնելիս տրամաչափով չեմ ղեկավարվում: Ղեկավարվում եմ իմ ուսումնասիրություններով, իմ վերլուծություններով, երկրի, իմ զավակների եւ թոռների ապագայի մասին մտածել-մտահոգվելով, դրանցից հետեւող ակնկալիքներով:
– Եթե Սերժ Սարգսյանը հրաժարվի վարչապետի պաշտոնից, ապա ո՞վ կարող է լինել այդ միակը եւ ստանձնել վարչապետի պաշտոնը:
– Բայց ինչո՞ւ միակը: Եթե ասում եք` միակը, նշանակում է եսակենտրոն ենք դարձնում: Այդպես չէ:
Եթե նույնիսկ նախագահ Սերժ Սարգսյանը հրաժարվի, ապա որպես մեր երկրի ակունքներում 30 տարի կանգնած եւ լրջագույն դերակատարում ունեցած մարդ, պետք է անպայմանորեն երկրի անվտանգության եւ Արցախի հարցի բանակցությունների ու քննարկումների վրա իր ազդեցությունը, փորձն ու գիտելիքներն օգտագործի:
Մենք ունենք մարդիկ, որ պարոն Սարգսյանի կողքին աշխատել են, աշխատում են, եւ, կարծում եմ, երբ գա ժամանակը, կկարողանան երկրի ղեկին նաեւ որպես վարչապետ լինել: Այս պահին ասում եմ` Սերժ Սարգսյանը: Եթե ասում եք` իսկ ո՞վ կարող է լինել: Ասում եմ` իր կողքին աշխատող մարդկանցից: Օրինակ՝ Կարեն Կարապետյանը, հետագայում:
Զրույցը` ՆԵԼԼԻ ԳՐԻԳՈՐՅԱՆԻ
«Առավոտ»
17.03.2018
