«Ով չի գերազանցում իր նախորդներին, նա անարգում է նրանց անունը՝ մեղանչելով հոգու զարգացման օրէնքի դէմ». Նժդեհ
Հայաստանի Անկախութեան 100 –ամեակին (1918-2018 Մայիս 28) ընդառաջ սկսում ենք միջոցառումների շարքը:
Մարտի 30 -ին, ժամը 19:00 Մոսկուայի Հայկական դեսպանատան դահլիճում տեղի կունենայ Հայ պէտական եւ ռազմական գործիչ, մեր ազգի մեծագոյն հերոսներից` Գարեգին Նժդեհին նուիրուած հայրենասիրական երեկոյ: Կազմակերպիչ` ՏԻՐ Հայագիտական Կենտրոն:
Հայ պէտականութեան վերականգնման տոնի կապակցութեամբ յատկապէս կարեւոր է դասախօսութիւնների եւ հայրենասիրական երեկոյների միջոցով մեր Անկախութեան ռահուիրաների յիշատակումը:
Ոչ պակաս կարեւոր է ճիշտ ներկայացնել ԱՄՆ-ում ստեղծուած Ցեղակրօն շարժումը, բացատրել պատճառները, ժամանակուայ մարտահրաւերները եւ ընդհանուր գաղափարախօսութիւնը: Այդ հարցում ինձ օգնական են Նժդեհի, Տարօնական շարժման, «Ռազմիկ» եւ «Տարօնի Արծիւ» պաշտոնաթերթերի հիմնադիր, փիլիսոփայութեան դոկտոր Հայկ Ասատրեանի, Ցեղակրօն ուսմունքի առաջամարտիկներ Արմենակ Բարսեղեանի, Օննիկ Զարմունու գրքերը եւ գրքոյքները:
Անցեալ տարի Նժդեհին նուիրուած երեկոյ կազմակերպեցինք Մոսկուայի Հայ եկեղեցուն կից գտնուող Տապան թանգարանում: Այս աւանդոյթը պէտք է շարունակական լինի եւ նորանոր մարդկանց համախմբի իր շուրջը: Հաշուի առնելով, որ 1918 թուականի նուաճումը ոգեշնչեց նորօրեայ անկախականներին 1988 թ. Մայիսի 28 –ին կազմակերպել Ազատութեան Հրապարակի մեծ հանրահաւաքը, անդրադառնալու ենք նաեւ պատմութեան այդ էջին: 70 տարի անց հարթակից կրկին մեր Եռագոյնն էին ծածանում Հայ ազգային հերոս Մովսես Գորգիսեանը, Մեխակ Գաբրիելեանը, յայտնի գիտնական, բանասէրներ Ռաֆայել Իշխանեանը, Վարագ Առաքելեանը եւ այլ նուիրեալներ:
Առանց պէտականութիւն ազգը նման է մեծ ընտանիքի, որ տուն չունի:
Հայ ժողովրդի միասնականութեան եւ անհատների անսահման նուիրուածութեան շնորհիւ մենք այսօր միջազգային յարաբերութիւնների սուբյեկտ ենք ու պարտաւոր ենք ուժեղացնել մեր դիրքերը առնուազն տարածաշրջանում: Դրա համար պիտի գիտակցենք ում որդիներն ենք եւ ինչ անելիք ունենք մեր կեանքում:
Դաւիթ Աղաջանեան
Տիր Հայագիտական Կենտրոն
«Առավոտ»
16.03.2018
