Aravot.am-ի հետ զրույցում Տերյան մշակութային կենտրոնի ղեկավար Լիլիթ Մելիքյանն ասաց, որ նոր՝ «Թելիկ-Մելիկ» հավաքածուն առաջին անգամ փակ ցուցադրությամբ կներկայացվի մարտի 19-ին «Յանս» ակումբում:
«Մեզ ավելի շատ ճանաչում են որպես ազգային թեմաներով զբաղվող կենտրոնի, բայց այս անգամ այդ թեմայից շեղվել ենք: Մոտ երկու տարի առաջ ես իմացա մի տաղանդավոր աղջկա՝ Մարգարիտա Կարապետյանի մասին: Մարգարիտայի ասեղնագործությունները բոլորից տարբերվում են իրենց առանձնահատուկ ոճով: Երբ առաջին անգամ հանդիպեցինք, որպեսզի զրուցենք համագործակցության մասին, նա ինձ բերեց իր աշխատանքներից մեկը: Ասաց, որ եթե չհասկանամ այնտեղ ինչ է պատկերված, մենք միասին չենք կարողանա աշխատել: Ես համբուրվող զույգ տեսա, բայց իրականում այնտեղ ձկնիկներ էին: Ինչևէ, Մարգարիտային դուր եկավ իմ պատասխանը, և մենք սկսեցինք համագործակցել»,- պատմում է Լիլիթ Մելիքյանը:
22-ամյա Մարգարիտան սիրում է ասեղնագործել, որովհետև դա իրեն հանգստություն է բերում: Նա սկսել է զբաղվել սրանով 12 տարեկանից: Հավաքածուի մեջ ոչ մի զգեստ չի կրկնվում: Դիզայնը Մարգարիտայինն է, զգեստները կարում է Տերյան մշակութային կենտրոնը:
Մարգարիտայի մոր՝ Էլիտա Բադալյանի խոսքերով՝ սկզբում ինքն այնքան էլ չէր հասկանում, թե իր աղջիկն ինչու է այդպես տարված թելերով, բայց Մարգարիտայի ուսուցչուհին նկատել է տաղանդն ու ուղղորդել դեպի Տերյան մշակութային կենտրոն:
Հավաքածուն կոչվում է «Թելիկ-Մելիկ»՝ ի պատիվ Մարգարիտայի՝ թելերի հանդեպ անսպառ սիրո: Լիլիթ Մելիքյանի խոսքերով՝ Մարգարիտայի հետ համագործակցությունը կշարունակվի:
Զարինե ԳՐԻԳՈՐՅԱՆ
