Այսօր 14:00-ին ՀՀ Սահմանադրական դատարանում նախատեսված էր Գյումրիում սպանված Ավետիսյանների ընտանիքի իրավահաջորդների դիմումի առնչությամբ որոշման հրապարակումը, սակայն այն որոշակի ժամանակով հետաձգվել է:
Հիշեցնենք՝ Ավետիսյանները վիճարկում են որոշակի օրենսդրական նորմերի սահմանադրականության հարցը:
«Մեր՝ ոչ նյութական վնասի փոխհատուցման պահանջի հայցը դատարաններում քննության առարկա չդարձավ այն պատճառաբանությամբ, որ Քրեական դատավարության օրենսգիրքը չի նախատեսում ոչ նյութական վնասի փոխհատուցման պահանջի ներկայացում: Մենք սպառել էինք բոլոր դատական ատյանները, ինչից հետո դիմել ՍԴ՝ վիճարկելով այն նորմերը, որոնք դատարանների կողմից վկայակոչվում էին որպես հիմք առ այն, որ Ավետիսյանների իրավահաջորդները զրկված են նշյալ պահանջը ներկայացնելու հնարավորությունից»,-Aravot.am-ի հետ զրույցում պարզաբանեց Ավետիսյանների իրավահաջորդների շահերի ներկայացուցիչ, փաստաբան Արամազդ Կիվիրյանը:
Նա նշեց, որ Ավետիսյանները որպես ոչ նյութական վնասի հատուցման չափ էին ներկայացրել գումարի տեսքով. «Գտնում ենք, որ Ռուսաստանի Դաշնությունը պետք է վճարի 450 000 եվրոյին համարժեք դրամ՝ որպես բարոյական վնասի փոխհատուցում»:
Փաստաբանը հավելեց, որ ՍԴ որոշումից հետո միայն պարզ կդառնան իրավական դաշտում իրենց հետագա անելիքները:
Լուիզա ՍՈՒՔԻԱՍՅԱՆ
