Այսօր ԱԺ Գիտության, կրթության, մշակույթի, երիտասարդության եւ սպորտի հարցերի մշտական հանձնաժողովը քննարկում է «Բարձրագույն կրթության մասին» օրենքը եւ հարակից օրենքներում փոփոխություններ եւ լրացումներ կատարելու մասին հարցը: Պատգամավորների կողմից 7 առաջարկ է արվել: Հարցի հիմնական զեկույցող ԿԳ նախարար Լեւոն Մկրտչյանը հավաստիացնում է` առաջինից երկրորդ ընթերցում էլի քննարկումներ կլինեն խորհրդարանական ուժերի հետ:
Հանձնաժողովում բուռն քննարկման առարկա դարձավ վիճելի հարցերից մեկը` ԵՊՀ-ի հոգաբարձուների խորհրդի կազմը հաստատվում է վարչապետի կողմից: Կառավարությունն այսպես է առաջարկել: Սրա հետ համաձայն չեն «Ելք»-ի անդամները եւ շատ փորձագետներ: Քաղաքական խնդիր են տեսնում: Նախագծի քննարկման խորհրդարանական լսումների ժամանակ շատ խոսվեց այս մասին:
ԱԺ ՀՅԴ խմբակցության պատգամավոր Արմենուհի Կյուրեղյանը առաջարկել է, որ խորհրդի կազմը հաստատի լիազոր մարմինը, իսկ լիազոր մարմնի կազմը հաստատի նախարարը: «Մենք երեք տարբերակ ենք առաջարկել` վարչապետը, կառավարությունը կամ նախարարը հաստատի: Կառավարության հաստատելը նպատակահարմար չէ, քանի որ բոլոր գերատեսչությունները պետք է գնան ծանոթանան խորհրդի կազմի հետ եւ այլն: Տիկին Կյուրեղյանի առաջարկը մեզ համար ընդունելի է»,- ասաց նախարարը:
«Եթե օրենքը ամենաբարձր օղակին է թողել այս հարցը, առաջարկում եմ այդպես էլ մնա: Խորհրդի կազմի հաստատելը չիջեցնենք մեկ օղակ ներքեւ: ԿԳՆ-ն այսպես թե այնպես մասնակից է լինելու դրան»,- առարկեց ՀՀԿ-ական պատգամավոր Կարեն Ավագյանը:
«Ելք» ընդդիմադիր խմբակցության պատգամավոր Արարատ Միրզոյանն էլ կողմնակից է ՀՅԴ-ական պատգամավոր Արմենուհի Կյուրեղյանի առաջարկի հետ: «Վարչապետի հաստատման դեպքում կա քաղաքական ենթատեքստ: Գիտենք, որ զանազան օրենքներով ապագա վարչապետի դերն ավելի բարձրացվում է ամեն մի ոլորտում, ինչը տեղին թե անտեղի ենթադրությունների առիթ է տալիս: Սա հերթական առիթ է ինձ համար կասկածներ ունենալու: Եթե շատ սկզբունքային չի այս հարցը գործադիրի համար, առաջարկում եմ պաշտպանել տիկին Կյուրեղյանի առաջարկը»:
«Հասկանալի է, որ «Ելք»-ը չի սիրում վարչապետի ինստիտուտը. թողեք նախարարը հաստատի խորհրդի անդամներին»,- սա էլ հանձնաժողովի անդամ Վարդան Բոստանջյանի մոտեցումն է:
Կարեն Ավագյանը տարակուսեց` չի կարող մյուս ԲՈՒՀ-երում խորհուրդները հաստատի վարչապետը, իսկ ԵՊՀ-ում նախարարը: «Ելք»-ի մոտեցումն ինքը «անհասկանալի կապրիզ» է որակում: Իր համար ընկալելի կլիներ, եթե բոլոր ԲՈՒՀ-երի մասով առաջարկ ներկայացվեր:
ՀՅԴ-ական պատգամավորի առաջարկը հանձնաժողովում մերժվեց 4 «դեմ», 5 «կողմ» ձայների հարաբերակցությամբ: «Կողմ» էին միայն հանձնաժողովի անդամ ՀՀԿ-ական պատգամավորները:
Նելլի ԳՐԻԳՈՐՅԱՆ
