Այսօր, ՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը Հայաստանի պետական տնտեսագիտական համալսարանի դասախոսներին և ուսանողներին ներկայացրեց վերջին 5 տարիներին ՀՀ Մրցակցային մարմնի կատարած աշխատանքը, երկրի մրցակցային իրավիճակի բարելավման տեմպերն ու զարգացման հեռանկարները: Ծավալուն դասախոսության ընթացքում, ՏՄՊՊՀ նախագահը ներկայացրեց Հանձնաժողովի առաջնահերթություններն ու անդրադարձավ մեր երկրի մրցակցային իրավիճակը բնութագրող միջազգային հեղինակավոր կառույցների գնահատականներին:
«Առանձնակի կարևորում եմ ապագա տնտեսագետ ուսանողների հետ նման հանդիպումները, քանի որ հենց նրանք են լինելու մեր տնտեսության վաղվա հենասյուները, վաղվա որոշում կայացնողներն ու ոլորտի ղեկավարները։ Ինձ, որպես երկրի Մրցակցային մարմնի ղեկավարի, հետաքրքիր է նաև ձեզանից յուրաքանչյուրի պատկերացումները, տեսակետներն ու նաև առաջարկները՝ մեր պետության տնտեսական մրցակցության զարգացման վերաբերյալ»,-նշեց Ա.Շաբոյանը և հավաստիացրեց, որ նման հանդիպումները շարունակական բնույթ են կրելու:
Ա. Շաբոյանը նշեց նաև, որ Հանձնաժողովի փորձը հավաստում է, որ հաճախ հասարակությունը այնքան էլ հստակ չի պատկերացնում այն հիմնական գործառույթները, որոնք գտնվում են ՀՀ Մրցակցային մարմնի կարգավորման դաշտում, իսկ դա խիստ կարևոր է. « Քանի որ մեր կառույցի ռեսուրսները սահմանափակ են և ոչ բոլոր խնդիրներն է հնարավոր սեփական նախաձեռնությամբ բացահայտել, այդ իսկ պատճառով կարևոր է հասարակության տեղեկացվածության մակարդակի բարձրացումը, որպեսզի, խնդրի մասին մեզ տեղեկացնելով՝ առաջին հերթին իրենք պաշտպանեն իրենց շահերը և ապա նպաստեն գլոբալ առումով այդ խնդրի կարգավորմանն ընդհանրապես»: Պատասխանելով ՀՀ նոր Սահմանադրության ներքո օրենսդրական փոփոխությունների վերաբերյալ համալսարանի դասախոսների հարցերին, Ա. Շաբոյանը նշեց, որ օրեր առաջ տնտեսական մրցակցության պաշտպանության մասին օրենքի նախագիծը միաձայն ընդունվել է ԱԺ-ում. Նոր օրենսդրական փաթեթով իսկապես էական և աննախադեպ փոփոխություններ է նախատեսվում իրականացվում. «Նոր օրենսդրությամբ բարձրացվում է ՀՀ Մրցակցային մարմնի կարգավիճակը և օրենքում հստակ ամրագրվում է, որ Հանձնաժողովը հանդիսանում է անկախ ինքնավար մարմին: Վերանայվել են նաև պատասխանատվության միջոցների կիրառման մեխանիզմները, դրանք համապատասխանեցվել են միջազգային չափանիշներին: Շատ կարևոր և էական փոփոխություն ենք համարում այն, որ Հանձնաժողովի տեսադաշտ ենք բերում պետական պաշտոնյաների հակամրցակցային գործողությունները: Օրենքով արգելվում է պետական պաշտոնյաների կողմից հակամրցակցային գործունեության դրսևորումը: Նման դեպքերում ևս կկիրառվեն պատասխանատվության միջոցներ»: ՏՄՊՊՀ նախագահը նշեց, որ ընդհանուր առմամբ, նոր օրենսդրական փաթեթով ընդլայնվում է Հանձնաժողովի գործիքակազմը, ավելանում են նոր մեխանիզմներ և լիազորություններ, որոնք հնարավորություն կտան հակամրցակցային համաձայնությունները բացահայտել առավել արդյունավետ»:
Ա. Շաբոյանը պատասխանեց նաև մեր երկրի տնտեսական զարգացման հեռանկարների, գերիշխող դիրք ունեցող տնտեսվարողների, ֆինանսական շուկաների և այլ թեմաների վերաբերյալ հարցերին:
՝ Տեղեկացնենք նաև, որ ՏՄՊՊՀ նախագահը ևս Հայաստանի պետական տնտեսագիտական համալսարանի շրջանավարտ է և հետագայում շարունակել է իր համագործակցությունը համալսարանի հետ՝ զբաղվելով գիտական և դասախոսական աշխատանքով:
Հանձնաժողովը նման հանդիպումներ կկազմակերպի նաև այլ ԲՈՒՀ-ում՝ ՀՀ մրցակցային մարմնի հիմնական գործառույթների, առկա մարտահրավերների, ձեռքբերումների վերաբերյալ տեղեկացվածության մակարդակի բարձրացման, ինչպես նաև ոլորտի ապագա մասնագետների գնահատականներին, տեսակետներին ու առաջարկներին ծանոթանալու նպատակով:
ՀՀ ՏՄՊՊՀ
