Կաշառք պահանջելու եւ ստանալու մեջ մեղադրվող Շենգավիթի նախկին դատավոր Իշխան Բարսեղյանն այսօր իր դեմ հարուցված քրեական գործով կրկին դատարան չէր ներկայացել:
Հիշեցնենք, որ Իշխան Բարսեղյանը դեռ մի քանի նիստ առաջ դիմում էր ներկայացրել դատարան՝ խնդրելով նիստերը առժամանակ հետաձգել, մինչեւ ինքը կապաքինվի, վատառողջ է ու չի կարող ներկայանալ նիստերին: Դատարանը մի քանի անգամ արդեն հետաձգել է նիստը:
Այսօր մեղադրող դատախազ Կարեն Բիշարյանը հայտարարեց՝ Իշխան Բարսեղյանը միտումնավոր ցանկանում է ձգձգել դատաքննությունը.
«Դատապարտյալների հիվանդանոցից մենք տեղեկություն ենք ստացել, որ Իշխան Բարսեղյանը կարողանում է ինքնուրույն տեղաշարժվել եւ միտում եմ տեսնում Իշխան Բարսեղյանի կողմից, որ դատաքննությունը ձգձգվի»:
Դատավոր Վաչե Մարգարյանն էլ հայտարարեց, որ արդեն տեւական ժամանակ Իշխան Բարսեղյանի չներկայանալով խաթարվում է դատաքննության բնականոն ընթացքը, եւ ինքը Իշխան Բարսեղյանի նկատմամբ դատական սանկցիա է կիրառում նկատողության տեսքով, հետագայում նման կերպ շարունակվելու դեպքում ավելի խիստ դատական սանկցիա կկիրառվի:
Դատական հաջորդ նիստը նշանակվեց մարտի 22-ին:
Հիշեցնենք, որ Իշխան Բարսեղյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով՝ կաշառք ստանալը: Կաշառքի միջնորդություն կատարելու համար փաստաբան Էլզա Զաքարյանին էլ մեղադրանք է առաջադրվել ՀՀ քրեական օրենսգրքի 313-րդ հոդվածի 1-ին մասով՝ Կաշառքի միջնորդությունը: Իշխան Բարսեղյանի նկատմամբ որպես խափանման միջոց ընտրվել է կալանավորումը:
Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:
Արփինե ՍԻՄՈՆՅԱՆ
