Նոյեմբերին ՀՀ-ի եւ Եվրամիության միջեւ ստորագրված՝ ընդլայնված եւ համապարփակ գործընկերության համաձայնագիրը ենթադրում է նաեւ բարեփոխումներ՝ Հայաստանի հանրային կառավարման ոլորտում: Այս մասին այսօր լրագրողների հետ զրույցում հայտնեց ՀՀ փոխարտգործնախարար Կարեն Նազարյանը: «ԵՄ Արեւելյան գործընկերության երկրների հետ մենք քննարկում ենք բարեփոխումների ընթացքը, նաեւ համեմատում, թե որ երկիրն ինչ աստիճանի վրա է գտնվում»,-նկատեց նա:
Ինչ վերաբերում է ՀՀ-ԵՄ համաձայնագրի կյանքի կոչվելուն, փոխարտգործնախարարը նշեց՝ այն կսկսվի կիրառվել վավերացումից հետո. «Դրանից հետո համաձայնագրի մեծ մասի դրույթները կդրվեն ժամանակավոր կիրառման մեջ: Համաձայնագրում է նման դրույթ նախատեսված»:
Կարեն Նազարյանը նաեւ ասաց, որ նշյալ գործընթացը պետք է տեղի ունենա մինչեւ ապրիլի մեկը, այսինքն՝ ապրիլի մեկից հետո կմեկնարկի համաձայնագրի կիրառման գործընթացը:
Լուիզա ՍՈՒՔԻԱՍՅԱՆ
