Քաղտեխնոլոգ Վիգեն Հակոբյանի դիտարկմամբ, ԼՂ նախագահ Բակո Սահակյանի ՝ ԱՄՆ այցը քաղաքական առումով մեծ քայլ է, թեեւ այն չի կարող դիտարկվել պաշտոնական այց՝ հաշվի առնելով, որ չճանաչված երկրի ղեկավար է:
«Սա կարեւոր քայլ է այն առումով, որ ԱՄՆ ղեկավարությունը փորձում է շոշափել անմիջականորեն Արցախի ղեկավարության տրամադրությունները: Թե ՛ Ադրբեջանի, թե՛ ՀՀ նոր իշխանությունների ձեւավորումից հետո սկսվելու է մի նոր փուլ Արցախի հիմնահարցի կարգավորման գործընթացում, որտեղ գերտերություններն ուզում են ուղղակիորեն շփվել կարեւորագույն սուբյեկտի՝ Արցախի հետ: Բոլորը հասկանում են, որ առանց Արցախի դիրքորոշման ու որոշման հնարավոր չեն լուծումներ»,- այսօր «Բլից ինֆո» ակումբում ասաց քաղտեխնոլոգը:
Ըստ նրա՝ այցը նախատեսված է բավականին մանրակրկիտ, բարձրացրեց Ադրբեջանի վայնասունը. «Բակո Սահակյանի հանդիպման օրակարգում կան կարևոր հանդիպումներ կոնգրեսականների հետ, հավանաբար նախ եւ առաջ հայկական լոբբինգի հետ, հանդիպումներ նաեւ փորձագիտական շրջանակի հետ»:
Քաղտեխնոլոգի կարծիքով, Ադրբեջանը վաղուց հասկացել է, որ աշխարհն ընտելացել է այն մտքի հետ, որ դե ֆակտո Արցախում կա հայկական ուժերի գերակայություն եւ ցանկացած հանդիպումին նախորդող ադրբեջանական ագրեսիան հենց դրանով է պայմանավորված. «Ուզում են ցույց տալ, որ եթե ընդունում եք այսօրվա ստատուս քվոն, մենք չենք ընդունում ու ցանկացած պահի ուժով կարող ենք փոխել»:
Արփինե ՍԻՄՈՆՅԱՆ
