«Հայաստանում կառավարման կարգը կփոխվի, ֆորմալ, բայց ես հույս ունեմ, որ դա որեւէ կերպ չի ազդի հանդիպումների ինտենսիվության եւ ձեւաչափի վրա». Կոնստանտին Կասաչով

Այսօր, ՀՀ Ազգային ժողովի արտաքին հարաբերությունների մշտական հանձնաժողովի եւ ՌԴ ԴԺ Դաշնության խորհրդի միջազգային գործերով կոմիտեի համատեղ նիստի ժամանակ ՌԴ պատվիրակության ղեկավար Կոնստանտին Կասաչովը ոչ պաշտոնական սկսեց իր խոսքը: Ու բացատրեց. «Մեր հարաբերությունները դուրս են եկել զուտ խորհրդարանական համագործակցության ձեւաչափից եւ կարող ենք առանց նախնական արարողակարգային ձեւաչափերի խոսել այն հարցերի մասին, որոնք հուզում են մեր ընտրողներին, հանրություններին»:

Ռուս պատգամավորը նկատեց`բացի խորհրդարանական ձեւաչափերից, Հայաստանի եւ ՌԴ-ի միջեւ դինամիկ հարաբերություններ են զարգանում. «Բոլորս էլ գիտենք, թե ինչքան շատ են երկու երկրների նախագահների միջեւ հանդիպումները: Հիմա Հայաստանում կառավարման կարգը կփոխվի, ֆորմալ, բայց ես հույս ունեմ, որ դա որեւէ կերպ չի ազդի հանդիպումների ինտենսիվության եւ ձեւաչափի վրա»:

Բանախոսը «փայլուն» գնահատեց ՀՀ Ազգային ժողովի արտաքին հարաբերությունների մշտական հանձնաժողովի եւ ՌԴ ԴԺ Դաշնության խորհրդի միջազգային գործերով կոմիտեի համատեղ աշխատանքը: Ասաց. «Արմեն Գեւորգովիչի հետ պայմանավորվել ենք շփումները ավելի հաճախ դարձնել, այլ միջխորհրդարանական ձեւաչափեր էլ ենք ստեղծել, քանի որ ավելորդ հանդիպումներ եւ հարթակներ չեն լինում: Կփորձենք պահպանել տարին երկու անգամ հանդիպելու հաճախականությունը»:

Նաեւ նկատեց`կան հարցեր, որ հենց մշտական հանձնաժողովի քննարկման իրավասության տակ են. «Մտքերի փոխանակությունը, որոշ հարցերի շուրջ, որոնք վերաբերվում են երկկողմ այն հարաբերություններին, որոնք նաեւ միջազգային հարթություն են շոշափում: Հենց մտքերի փոխանակությունը: Ոչ ոք չի ասում, որ միմյանց վզին տեսակետեր կամ գնահատականներ ենք փաթաթելու»: Խոսքը երկու երկրների անմիջական հարեւանների, ընդհանուր հարեւանների հետ հարաբերությունների մասին է եւ այն երկրների, որոնք ըստ բանախոսի, Հայաստանի, ՌԴ-ի շուրջ «մանյովրներ են անում»:

Ռուս պատգամավորը ԵԱՏՄ-ն դինամիկ եւ հետաքրքիր զարգացող համագործակցություն է համարում, որտեղ ՀՀ-ն եւ ՌԴ-ն իր կարծիքով արդյունավետ աշխատում են: «Ցավոք, դեռ ԵԱՏՄ պառամենտական վեհաժողով չկա: Սա նույնպես քննարկման թեմա է»,- ասաց նա`հավելելով, որ 7 միջխորհրդարանական հարթակ կա, որտեղ ՀՀ-ն եւ ՌԴ-ն աշխատում են, փորձում են մոտեցնել տեսակետները կամ գոնե միմյանց հասկանալ, ինչը լավ կլինի ոչ միայն մեր պատվիրակությունների համար, այլ այդ հարթակների, որոնք փորձում են առաջ շարժվել:

ՀՀ ԱԺ արտաքին հարաբերությունների հանձնաժողովի նախագահ Արմեն Աշոտյանն էլ իր խոսքում նկատեց`համատեղ նիստերն ավանդական են դարձել եւ խորհրդարանական համագործակցության այս ձեւաչափն իր ուրույն ավանդն ունի հայ-ռուսական ռազմավարական երկխոսության մեջ` ներկայացնելով երկու պետությունների ժողովուրդներին: Ասաց`պատգամավորներն արտահայտում են իրար հանդեպ ինչպես բարեկամական զգացումներ, այնպես էլ պատրաստ են քննարկել աշխատանքային ամենադժվար հարցերը:

Այս նիստում չորս հիմնական թեմա կքննարկվի`գլոբալ, տարածաշրջանային եւ երկկողմ հարաբերություններին վերաբերվող:

Նելլի ԳՐԻԳՈՐՅԱՆ