Կառավարության ներդրումներից 42 միլիոն դոլար կուղղվի ՀԷԿ-եր կառուցելուն:
Այսօր Aravot.am-ը Ecolur.org կայքի խմբագիր, փորձագետ Վիկտորյա Բուռնազյանից, որը մեկ առ մեկ թվարկում էր, թե հանրապետության գետերի վրա կառուցված հարյուրավոր ՀԷԿ-երն ինչպիսի բնապահպանական վնասներ են հասցնում շրջակա միջավայրին, հետաքրքրվեց, թե միլիոնավոր դոլարների ՀԷԿ-եր կառուցվելու դեպքում ինչպիսի վնասներ ենք ունենալու:
Վիկտորյա Բուռնազյանի խոսքով, նախատեսվում է Շնող, Մեղրի, Լոռի բերդ ՀԷԿ-երի կառուցումը, սակայն ամենամեծը թվարկածներից Շնող ՀԷԿ-ը պետք է լինի, որը պետք է ունենա մեծ ջրամբար. «Եթե ունեցավ մեծ ջրամբար, մենք մեծ տարածքներ կկորցնենք»: Այսինքն` ըստ փորձագետի, կառավարության ներդրումներով ՀԷԿ-երը կվտանգեն մեր երկրի առանց այդ էլ ՀԷԿ-երի պատճառով վտանգված ջրային ռեսուրսները:
Մանրամասները` տեսանյութում
Վիկտորյա Բուռնազյանի հավաստմամբ, բազմաթիվ ՀԷԿ-եր չեն պահպանում բնապահպանական թողքը եւ նախատեսվածից ավելի ջուր են վերցնում խողովակների մեջ, ինչը հանգեցնում է ձկնապաշարների, բուսականության նվազման կամ վերացման: 43 գետերից 15-ն էլ համարվել են 5-րդ կարգի աղտոտված: Փամբակ, Դեբեդ, Հրազդան, Ախթալա, Գորիս, Արծվանիկ եւ մի շարք այլ գետեր հանքարդյունաբերության, արտադրական եւ խրախճանքի օբյեկտների թափոնների հետեւանքով աղտոտվել են ծանր մետաղներով, կեղտաջրերով: Ախթալայի կոմբինատի թափոնների պատճառով էլ Ախթալա գետից ոչինչ չի մնացել, այն դարձել է պոչատար:
Մեր այն հարցին, թե մարտի 1-ին կառավարությունը մի որոշում ընդունեց, որով սահմանվում էր ՀԷԿ-երի թույլտվություն տալու նոր չափորոշիչներ, որքանով շրջակա միջավայրը պաշտպանված կլինի այդ որոշումից հետո, Վիկտորյա Բուռնազյանը դժվարացավ պատասխանել, քանի որ նոր ՀԷԿ-երի կառուցման համար մեր հիդրոռեսուրսն արդեն սպառված է. «Շատ քիչ տեղեր կան, որտեղ կարող են ՀԷԿ-եր կառուցվեն:
Ջրային ռեսուրսների շահագործումն այն աստիճան է հասել, որ ըստ Վիկտորյա Բուռնազյանի, անգամ ատոմակայանի ջրերն են պակասել: Նրա խոսքով՝ պատճառը Արարատյան դաշտավայրի ձկնաբուծարաններն են, որոնք արտեզյան ջրերը գերշահագործելու հետեւանքով դարձել են սպառնալիք ՀԱԷԿ-ի համար:
Մանրամասները` տեսանյութում
Լուսինե ԲՈՒԴԱՂՅԱՆ
