«Ամեն անգամ, երբ Ադրբեջանը ՌԴ-ից նոր զինատեսակ է ստանում, ինչ-որ ժամանակ հետո զորավարժություններ է անցկացնում: Այլ հարց է զորավարժությունների անցկացման ժամանակահատվածը: Իսկ առաջիկայում Ադրբեջանում նախագահական ընտրություններ են, և Ալիևը պետք է ինչ-որ բաներ ցույց տա, «թիթիզանա»: Այդ ինչ-որ բանն էլ հենց զորավարժությունների անցկացումն է»,-այսօր «Հենարան» ակումբում անդրադառնալով երեկ մեկնարկած Ադրբեջանի զորավարժություններին՝ ասաց վերլուծաբան Թևան Պողոսյանը:
Ադրբեջանի նախաձեռնած վարժանքների մասին ԵԱՀԿ անդամ երկրներին նախօրոք ադրբեջանցիները չեն զգուշացրել, ըստ Թեւան Պողոսյանի. «Կանխատեսելի էր, որ նմանատիպ մի իրավիճակ պետք է ստեղծվեր: Մենք պետք է կարողանանք կանխատեսել և հաշվարկել Ադրբեջանի քայլերը՝ հասկանալու ինչպես պետք է հետագայում պաշտպանվենք զորավարժությունների ընթացքում նրա կողմից օգտագործված զինատեսակներից: Մյուս կողմից՝ Հայաստանը միգուցե պետք է բաց տեքստով հայտարարի, որ առաջին աստիճանի պատրաստության վիճակի է բերում իր զորքերը, քանի որ վստահություն չկա, որ Ադրբեջանը չթույլատրված գործողություններ չի սկսի»:
Բանախոսի կարծիքով, Ադրբեջանը շարունակում է պատրաստվել ռազմական սցենարներին, դա հասկանալով՝ հայկական կողմը պետք է ամեն բան անի, որ այդ մտքերը խափանվեն. «Մենք պետք է փոխենք խաղի կանոնները»: Պարոն Պողոսյանը նկատեց, որ ԼՂ նախագահ Բակո Սահակյանի՝ ԱՄՆ կատարած այցի ընթացքում պետք է այդ մասին մամուլում այնքան գրել, որ Ադրբեջանը խառնվի իրար:
Արփինե ՍԻՄՈՆՅԱՆ
