Քաղաքագետ, «Կովկասի ինստիտուտ»-ի գիտաշխատող Հրանտ Միքայելյանը կարծում է, որ Ադրբեջանի նախագահ Իլհամ Ալիեւի՝ «Երեւանն ու Զանգեզուրը վերադարձնելու» մասին վերջերս արված հայտարարության հիմքում Ադրբեջանում ապրիլին սպասվող նախագահական ընտրություններն են: «Նման հայտարարություններով ընտրողների պատրաստակամությունն են ուզում արթնացնել, որ քվեարկեն Ալիեւի օգտին: Գուցե այլ պատճառներ էլ կան, բայց իրենց համակարգը փակ է»,- Aravot.am-ի հետ զրույցում նշեց Հրանտ Միքայելյանը:
Նա ընդգծեց՝ Ադրբեջանից նախնինում էլ նման հայտարարություններ են հնչել, ուստի չի կարելի ասել, թե դրանց անպայման պետք է հետեւեն հակառակորդի կողմից ռազմական ոտնձգություններ. «Այս հարցում Ալիեւի ասածը, իմ կարծիքով, ոչ մի նշանակություն չունի: Բայց դա չի ենթադրում, թե չպետք է լուրջ վերաբերվենք: Մեր ռազմական ներուժն այն մակարդակի պետք է հասցվի, որ նա չհամարձակվի ռազմական գործողություններ սկսել»:
Քաղաքագետը նաեւ մատնանշեց՝ ինչպես Ադրբեջանից հեռացած ընդդիմադիր քաղաքագետներն են պնդում՝ հատկապես նախընտրական շրջանում Ադրբեջանում այժմ միջկլանային բախումներ են ընթանում: Դա է պատճառը, որ նախագահական ընտրությունները հոկտեմբերից տեղափոխվեցին ապրիլ:
Լուիզա ՍՈՒՔԻԱՍՅԱՆ
