ԵԱՀԿ Խորհրդարանական վեհաժողովի նախագահ Գեորգ Ծերեթելլի գլխավորած պատվիրակությունն այսօր Ադրբեջանի գործընկերների հետ քննարկել է այդ երկրում սպասվող նախագահական ընտրությունները և տնտեսական ու ժողովրդավարական բարեփոխումների հարցը՝ ընդգծելով, որ Ադրբեջանը կամուրջ կարող է լինել ԵԱՀԿ տարածությունում երկխոսության և համագործակցության համար:
ԵԱՀԿ ԽՎ պատվիրակությունը հիշեցրել է Լեռնային Ղարաբաղի հակամարտության հետևանքով շարունակվող մարդկային կորուստների մասին և կողմերին կոչ արել կրկնապատկել ջանքերը հակամարտությունը լուծելու համար:
Ծերեթելին հանդիպում է ունեցել Ադրբեջանի նախագահ Իլհամ Ալիևի հետ և մտահոգություն հայտնել շփման գծում խախտումների և սահմանին մոտ գտնվող տարածքներում քաղաքացիների անտանելի զրկանքների վերաբերյալ:
ԵԱՀԿ ԽՎ նախագահը վերահաստատել է իրենց պատրաստակամությունը՝ աջակցել ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկի միջնորդական ջանքերին:
Ծերեթելին, թեև ողջունել է Ադրբեջանի կարևորությունը որպես տարածաշրջանում համագործակցության առանցքային երկիր, միաժամանակ հիշեցրել է այդ երկրում մարդու իրավունքների խախտումների մասին:
«Պետք է հետևել ժողովրդավարական բարեփոխումներին, մասնավորապես մամուլի ազատությունը, և պայմաններ ստեղծել քաղաքացիական հասարակության դերակատարությունն ավելացնելու համար: Ադրբեջանում ժողովրդավարական և տնտեսական բարեփոխումները նշանակում է ընդլայնված անվտանգություն ԵԱՀԿ-ում»,- ասել է Ծերեթելին:
Պատրաստեց՝ Վիկտորյա ԱՆԴՐԵԱՍՅԱՆԸ
