2017 թվականի մայիսի 14-ին Երեւանի ավագանու ընտրությունների օրը Երեւանի Ավան վարչական շրջանի Աճառյան 39/1 հասցեում «Երկիր Ծիրանի» կուսակցության նախագահ, ՀՀ ԱԺ պատգամավոր եւ Երեւանի քաղաքապետի թեկնածու Զարուհի Փոստանջյանի եւ նրա դուստր ու վստահված անձ Լիլիթ Դրամփյանի նկատմամբ տեղի ունեցած բռնությունների դեպքով հարուցված քրեական գործը կարճվել էր, չնայած Զարուհի Փոստանջյանն ու Լիլիթ Դրամփյանը ճանաչվել են տուժող:
«Քրեական գործով վարույթը կարճելու եւ քրեական հետապնդում չիրականացնելու մասին» ՀՀ հատուկ քննչական ծառայության 2017 թ. սեպտեմբերի 13-ի որոշման դեմ «Երկիր Ծիրանի» կուսակցության նախագահ Զարուհի Փոստանջյանի բողոքի քննությունը Երեւան քաղաքի ընդհանուր իրավասության դատարանում (դատավոր՝ Ա. Մաթեւոսյան) հետաձգվեց դատախազի, քննիչի եւ տուժող Լիլիա Դրամփյանի բացակայության, ինչպես նաեւ այն պատճառով, որ դատարանը վարույթն իրականացնող մարմնի ներկայացուցիչներից գործին առնչվող նյութերը դեռ չի ստացել:
Դատավոր Ա Մաթեւոսյանն առաջարկեց հաջորդ դատական նիստը նշանակել ապրիլի 10-ին, սակայն Զարուհի Փոստանջյանը խնդրեց նիստը նշանակել ավելի ուշ՝ պատճառաբանելով. «Քաղաքական իրադարձություններից ելնելով ես այդ օրերին շատ զբաղված կլինեմ»:
Փոխադարձ համաձայնությամբ հաջորդ նիստը նշանակվեց ս/թ. ապրիլի 18-ին, ժամը 16:00-ին:
Աշոտ ՀԱԿՈԲՅԱՆ
