«Ամեն դեպքում, անկախ քաղաքական իրավիճակից, անկախ այս լճացած քաղաքական իրավիճակից՝ ցանկացած գրագետ, կիրթ, զարգացած եւ փորձ ունեցող մարդու առկայությունը հատկապես իշխանական ոլորտում ես դրական եմ համարում»,- «Առավոտի» հարցին` արդեն ընտրված նախագահ Արմեն Սարգսյանի վարկը Հայաստանին օգուտ կբերի՞, պատասխանեց նախկին պատգամավոր, ՀՀՇ վարչության անդամ Հովհաննես Իգիթյանը:
Մեր զրուցակիցն ասում է` շատ կցանկանար, որ ՀՀԿ խմբակցության վեց տասնյակ մարդիկ էլ լինեին բարձր մակարդակի: Այնինչ ՀՀԿ խմբակցությունում միայն 3-4-ն են, որ կարողանում են ինչ-որ բանից խոսել: Ելնելով այս իրողությունից՝ Հովհաննես Իգիթյանը կրկնում է ՀՅԴ խմբակցության ղեկավար Արմեն Ռուստամյանի արտահայտությունը. «Այս իրավիճակում ՀՀԿ-ն ավելի լավ թեկնածու չէր կարող ունենալ»: Նա կարծում է, որ իրավիճակն անհամեմատելի կլիներ, եթե 3-րդ, 4-րդ դասարան ավարտած որեւէ մականունավոր ՀՀԿ-ական առաջադրվեր նախագահի պաշտոնում:
«Առավոտ»
10.03.2018
