Ուկրաինայի իշխանությունները պետք է թույլատրեն ադրբեջանական Turan գործակալության ամստերդամյան գրասենյակի լրագրող Ֆիքրեթ Հուսեյնլիին անվտանգ լքել երկրի սահմանները: Այս մասին ասվում է «Լրագրողների պաշտպանության կոմիտեի» (CPJ) տարածած հաղորդագրության մեջ:
Մարտի 5-ին Հուսեյնլին հարձակման էր ենթարկվել Կիևում վարձակալած իր բնակարանում: CPJ-ի հետ զրույցում պատմելով մարտի 5-ի միջադեպի մասին՝ Հուսեյնլին ասել է, որ իր վրա հարձակումն իրականացրել են ադրբեջանախոս տղամարդիկ, ենթադրաբար Ադրբեջանի անվտանգության ծառայության գործակալներ:
Ուկրաինայի իշխանությունները 2017թ. հոկտեմբերի 14-ին Բաքվի խնդրանքով ձերբակալել էին Ինտերպոլով հետախուզման մեջ գտնվող լրագրողին, առգրավել նրա ճանապարհորդական փաստաթղթերը: Հոկտեմբերի 27-ին Կիևի դատարանը նրան գրավի դիմաց ազատ էր արձակել՝ պայմանով, որ լրագրողը դեռ 2 ամիս պետք է մնա Ուկրաինայում, քանի դեռ երկրի գլխավոր դատախազությունը քննում է նրան Ադրբեջանին արտահանձնելու հարցումը: Դրանից հետո դատարանը երկու անգամ երկարաձգել է այդ ժամկետը, նոր վերջնաժամկետը 2018թ. մարտի 20-ն է:
Ադրբեջանում Հուսեյնլին մեղադրվում է անօրինական սահմանը հատելու, խաբեության և փաստաթղթերի կեղծման մեջ: Ինքը՝ Հուսեյնլին, հերքում է այդ մեղադրանքները՝ նշելով, որ դրանք պայմանավորված են իր լրագրողական գործունեությամբ:
«Մենք կոչ ենք անում Ուկրաինայի իշխանություններին անհապաղ վերադարձնել Ֆիքրեթ Հուսեյնլիի ճանապարհորդական փաստաթղթերը և թույլ տալ նրան լքել Ուկրաինան,- ասել է CPJ-ի՝ Եվրոպայի և Կենտրոնական Ասիայի ծրագրերի համակարգող Նինա Օգնիանովան:- Կիևը չպետք է մեղսակից լինի Ադրբեջանի իշխանությունների քննադատների՝ այդ երկրի սահմաններից դուրս հետապնդումներին: Մենք նաև կոչ ենք անում Ուկրաինայի ոստիկանությանը քննել մարտի 5-ին Հուսեյնլիի դեմ ֆիզիկական հարձակումը և պատասխանատվության ենթարկել մեղավորներին»:
Ուկրաինայի գլխավոր դատախազությունը չի պատասխանել CPJ-ի գրավոր հարցմանը: Անպատասխան են մնացել նաև կազմակերպության զանգերը և գրավոր հարցումները Ադրբեջանի ԱԳՆ-ին:
Պատրաստեց՝ Վիկտորյա ԱՆԴՐԵԱՍՅԱՆԸ
