«Եվրոպայի խորհուրդն օժանդակում է Հայաստանում փաստաբանի մասնագիտության զարգացմանը եւ փաստաբանների ներուժի ավելացմանը: Մենք կարեւորում ենք ԵԽ անդամ-երկրների եւ հայ փաստաբանների միջեւ փորձի փոխանակումը»,-Եվրոպայի խորհրդի երկրների փաստաբանների խնդիրներին նվիրված այսօրվա համաժողովի ժամանակ հայտարարեց Երեւանում Եվրոպայի խորհրդի գրասենյակի ղեկավարի տեղակալ Լորետա Վիոյուն:
Եվրոպայի փաստաբանների և իրավաբանների միությունների խորհրդի փոխնախագահ Ռանկո Պելիչարիչն էլ նկատեց՝ Հայաստանում դատական համակարգում նշանակալի բարեփոխումներ են ձեռնարկվել, որպեսզի ապահովվի դատարանների անկախությունը. «Այդ նպատակին հասնելու համար կարեւոր է վերահաստատել ՀՀ փաստաբանների պալատի անկախ դիրքը»:
Եվրոպայի փաստաբանների և իրավաբանների միությունների խորհրդի Չեխիայի պատվիրակության ղեկավար, չեխ հայտնի փաստաբան Ստանիսլավ Բալիկն էլ իր խոսքում առաջինը հիշատակեց Մխիթար Գոշի «Դատաստանագրքի»(«Գիրք դատաստանի») նշանակությունը: «Այն շատ կարեւոր միջնադարյան իրավական աշխատություն է, որը հաստատում է՝ դատավորը պետք է ունենա փորձ, գիտելիք ու գիտենա «Աստվածաշունչը», որպեսզի խուսափի տգիտությունից բխող սխալներից»,-ասաց նա, ապա հավելեց,-«դատավորին պետք է կրթել: Նա պետք է հասուն լինի բոլոր բնագավառներում, որպեսզի չխաթարի երկրային արդարությունը»:
Չեխ փաստաբանը համոզմունք հայտնեց, որ դատավորներն իրենց պարտականությունները պետք է կատարեն առանց որեւէ տեսակի հովանավորչության:
Լուիզա ՍՈՒՔԻԱՍՅԱՆ
