Եվրախորհրդարանի պաշտոնյաները չեն հետևի առաջիկայում Ռուսաստանում և Ադրբեջանում կայանալիք նախագահական ընտրությունների ընթացքին: Այս մասին գրում է «ՌԻԱ Նովոստին»՝ վկայակոչելով Եվրախորհրդարանի մամուլի հաղորդագրությունը:
Ռուսաստանում ընտրությունները նախատեսված են մարտի 18-ին, իսկ Ադրբեջանում՝ ապրիլի 11-ին:
«Եվրոպական խորհրդարանը չի հետևի ընտրական գործընթացներին, և, հետևաբար, չի մեկնաբանի դրանք ու ավելի ուշ հայտարարված արդյունքները»,- ասվում է հաղորդագրության մեջ:
Դրանում նշվում է, որ Եվրախորհրդարանի անդամներից ոչ մեկ պաշտոնապես մանդատ չի ստացել՝ դառնալու դիտորդ կառույցի անունից, հետևաբար ցանկացած նման նախաձեռնություն եվրապատգամավորներից որևէ մեկի կողմից կլինի բացառապես մասնավոր:
Եվրախորհրդարանից նաև հայտնել են, որ իրենց լիագումար նիստում պատրաստվում են ուսումնասիրել ԵՄ-ի և Ադրբեջանի հարաբերությունների մասին զեկույցը: Հենց այդ փաստաթղթում էլ կներկայացվի Եվրախորհրդարանի պաշտոնական դիրքորոշումն Ադրբեջանի ընտրությունների թեմային:
Պատրաստեց՝ Վիկտորյա ԱՆԴՐԵԱՍՅԱՆԸ
