ԱՄՆ Կոնգրեսի Հայկական հարցերով հանձնախումբը նամակ է հղել Ներկայացուցիչների պալատին՝ խնդրելով 2019թ. ֆիսկալ տարում 70 միլիոն դոլար տրամադրել Հայաստանի և Արցախի օգնությանը: Այս մասին հաղորդում է Ամերիկայի հայ դատի գրասենյակը:
«Մենք ցանկանում ենք շնորհակալություն հայտնել կոնգրեսական Փալոնին և Հայկական հարցերով հանձնախմբի ղեկավար կազմում նրա գործընկերներին Արցախին և Հայաստանին ուղղված օգնության փաթեթի հարցում Ներկայացուցիչների պալատի իրենց գործընկերների աջակցությունը խնդրելու համար»,- ասել է Ամերիկայի Հայ դատի հանձնախմբի գործադիր տնօրեն Արամ Համբարյանը:
Հանձնախումբը, մասնավորապես, 6 միլիոն դոլար է խնդրել Արցախի համար՝ ականազերծման և հաշմանդամների օգնության նպատակով, 4 միլիոն դոլար՝ խաղաղության աջակցման համար, ինչպես նաև 30 միլիոն դոլար Հայաստանին՝ որպես տնտեսական օգնություն:
Բացի այդ, 10 միլիոն դոլար կհատկացվի որպես ռազմական օգնություն, 20 միլիոն դոլար՝ որպես Մերձավոր Արևելքից փախստականների ընդունման համար օգնություն:
Հանձնախումբը խնդրել է նաև ռազմական օգնություն չտրամադրել Ադրբեջանին:
Պատրաստեց՝ Վիկտորյա ԱՆԴՐԵԱՍՅԱՆԸ
