Չնայած Լեռնային Ղարաբաղում այսօրվա ստատուս-քվոն չի կարող երկար պահպանվել, այդ հակամարտությունը ռազմական լուծում չունի: Այս մասին Trend-ի հետ զրույցում հայտարարել է ԵԱՀԿ Մինսկի խմբի ամերիկացի համանախագահ Էնդրյու Շաֆերը:
Շաֆերն ընդգծել է, որ ԱՄՆ-ը աջակցում է հակամարտության կարգավորման բանակցային գործընթացին և որպես ԵԱՀԿ ՄԽ համանախագահ՝ շարունակում է ակտիվ փոխգործակցությունը Հայաստանի և Ադրբեջանի հետ:
«ԱՄՆ-ի երկարաժամկետ քաղաքականությունը, որը կիսում են նաև Մինսկի խմբի համանախագահները, այն է, որ արդար կարգավորումը պետք է հիմնվի միջազգային իրավունքի սկզբունքների, այդ թվում Հելսինկյան եզրափակիչ արձանագրության վրա և նրա հիմնական սկզբունքների վրա՝ ուժի կամ ուժի սպառնալիքի չկիրառում, տարածքային ամբողջականություն, իրավահավասարություն և ինքնորոշման իրավունք: Մենք նաև համոզված ենք, որ այսօրվա ստատուս-քվոն չի կարող պահպանվել երկարաժամկետ հեռանկարում, և որ այս հակամարտության ռազմական լուծում գոյություն չունի»,- ասել է Շաֆերը:
Նրա խոսքով՝ Ժնևում Հայաստանի և Ադրբեջանի նախագահների արտահայտած վճռականությունը՝ ակտիվացնել բանակցային գործընթացը և լրացուցիչ քայլեր ձեռնարկել լարվածությունը թուլացնելու ուղղությամբ, արտացոլում է այդ իրականությունը:
«Ժնևի հանդիպումից հետո մենք՝ որպես համանախագահներ, մեծ աշխատանք ենք տարել հակամարտության կողմերի հետ՝ ստանձնած պարտավորությունները կյանքի կոչելու համար և կշարունակենք աշխատանքն այդ ուղղությամբ»,- ասել է դիվանագետը:
Ընդգծելով, որ ԱՄՆ-ը՝ որպես համանախագահ երկիր, հավատարիմ է բանակցային գործընթացին ԵԱՀԿ ՄԽ շրջանակում, Շաֆերն ընդգծել է, որ համանախագահները պատրաստ են աշխատել կողմերի հետ ցանկացած ձևաչափով, որը կնպաստի կայուն կարգավորմանը:
«Մենք շարունակում ենք նպաստել նրան, որ նախագահները և արտգործնախարարները հանդիպեն հնարավորինս հաճախակի՝ վերականգնելու քննարկումներն առանցքային հարցերի շուրջ, այդ թվում՝ հրադադարի ռեժիմի պահպանման կարևորություն, 2017թ. Ժնևում, ինչպես նաև 2016թ. Վիեննայում և Սանկտ Պետերբուրգում ընդունված որոշումների իրականացմանն ուղղված քայլեր»,- նշել է Շաֆերը:
Անդրադառնալով ԵԱՀԿ գործող նախագահի անձնական ներկայացուցչի գրասենյակի ընդլայնման հարցին՝ Շաֆերն ասել է, որ այդ քայլը կդառնա ապացույց, որ կողմերը հավատարիմ են շփման գծում լարվածությունը թուլացնելու միջոցառումների ձեռնարկմանը:
«Որոշումը նաև կօգնի ԵԱՀԿ-ին իր մանդատն իրականացնել ժամանակին և արդյունավետ: Համանախագահները կշարունակեն գործակցությունը կողմերի հետ՝ նրանց միջև այդքան կարևոր վստահությունը հնարավորինս արագ ձեռք բերելու համար»,- ասել է նա:
Պատասխանելով հարցին՝ որքանով են մոտ Բաքուն և Երևանը կայուն խաղաղությանը, Շաֆերը նշել է, որ հակամարտության լուծման հեշտ միջոցներ չեն լինում:
«Ես ԵԱՀԿ Մինսկի խմբի ԱՄՆ համանախագահ եմ նշանակվել 2017թ. օգոստոսին: Իմ գործունեության իրականացման ընթացքում ես հանդիպել եմ հակամարտության տարբեր ասպեկտներով զբաղված տարբեր մարդկանց հետ: Եվ չնայած ես լսել եմ բազմաթիվ լավ առաջարկներ ու գաղափարներ՝ հակամարտության հեշտ լուծումներ չկան: Անիրական կլիներ ակնկալել, որ լուրջ բեկման կարելի է հասնել առանց մեծ աշխատանքի և նախապատրաստության, որն էլ որոշակի ժամանակ կպահանջի»,- ասել է նա:
Շաֆերի խոսքով՝ բանակցային գործընթացում դրական առաջընթացի համար անհրաժեշտ են շարունակական անկեղծ ջանքեր ինչպես Բաքվի ու Երևանի, այնպես էլ համանախագահների և միջազգային հանրության կողմից, ինչն էլ վերջին հաշվով կստիպի կողմերին ծանր որոշում կայացնել:
Ինչ վերաբերում է համանախագահները հերթական տարածաշրջանային այցին, նա նշել է, որ իրենք այս պահին այդ հարցով հստակ ժամանակացույց չունեն, բայց շարունակում են կողմերի հետ խորհրդակցությունները՝ հաշվի առնելով տարածաշրջանում ընտրությունների ընթացիկ շրջանը:
Պատրաստեց՝ Վիկտորյա ԱՆԴՐԵԱՍՅԱՆԸ
