Այցելուները կհանդիպեն նորաձեւ
հագուկապով կերպասե քանդակների եւ մարիոնետների
Մշտապես հիացմունքով ենք փաստում արտասահմանում ստեղծագործող հայազգի յուրաքանչյուր արվեստագետի հաջողության մասին: Գեւորգ եւ Վարդան Թառլոյանները Փարիզի բարձր նորաձեւության ակադեմիայի 16 իսկական անդամներից են՝ Դիորի, Վերսաչեի, Վալենտինոյի, Ջիվանշեի, Ժան Պոլ Գոտյեի եւ այլ աշխարհահռչակ անունների կողքին:
«Առավոտը» երկու անգամ է հանդիպել երկվորյակ եղբայրներին (21.05.2013թ., 6.09. 2016թ.): Վերջին զրույցի ընթացքում կուտուրյե Թառլոյանները խոստացել էին 2017թ. ցուցադրություն ունենալ Երեւանում, որտեղ տեղ գտնեն էսքիզներ եւ առաջին անգամ հայաստանցիները կծանոթանան իրենց դիզայնով ստեղծված հագուստներին՝ քանդակային կերպարների միջոցով: Նույնիսկ վայրն էին ընտրել՝ Հայաստանի ազգային պատկերասրահ: Հետաքրքրությանը՝ ի՞նչ ասել է քանդակային կերպարներով հագուստ, նրանք մանրամասնել էին, որ դրանք նման չեն սրահների ցուցափեղկերում մանեքեններով հագուստներին: Նշել էին, որ զգեստը քանդակի վրա՝ ի տարբերություն մանեքենի, դիտվում է իբրեւ զուտ նորաձեւության նմուշ, տեղեկացրել էին, որ նման աշխատանքներ իրենք ժամանակին ցուցադրել են Փարիզի «Ժանսեմ» պատկերասրահում:
Մեզ հետ հանդիպման ժամանակ Թառլոյան եղբայրները հայտնեցին, որ իրենք Երեւանում են ՀՀ մշակույթի նախարարի հրավերով, մարտի 8-ին էլ Ազգային պատկերասրահում կկայանա «Պատրանք եւ իրականություն» շուրջ 75 էսքիզների եւ գեղանկարչական աշխատանքների ցուցադրությունը եւ դեֆիլե, որտեղ տեղացի 12 հայուհիներ կներկայացնեն 21 հագուստ: Հավելեցին նաեւ, թե այդ ամենը տեղի կունենա պատկերասրահի 4 մեծ սրահներում, կուղեկցվի կենդանի երաժշտությամբ, «Հովեր» կամերային երգչախմբի (ղեկավար՝ Սոնա Հովհաննիսյան), Հայաստանի պետական կամերային նվագախմբի (ղեկավար՝ Վահան Մարտիրոսյան), օպերային բարիտոն Գեւորգ Հակոբյանի, Վահագն Հայրապետյանի ջազ տրիոյի, քանոնահար Նարեկ Կազազյանի մասնակցությամբ:
«Դեֆիլեն կկայանա միայն մարտի 8-ին, իսկ շարունակվող կանանց մեկամսյակի ընթացքում պատկերասրահի այցելուները կհանդիպեն նորաձեւ հագուկապով կերպասե քանդակների եւ մարիոնետների»,- ասաց Գեւորգ Թառլոյանը: Վարդանն էլ շարունակեց, թե առաջին անգամ պատկերասրահը տրամադրել է 18-րդ դարի ֆրանսիական եւ հոլանդական կահույք, ինչը կօգնի ստեղծել իրենց արվեստին բնորոշ ջերմ մթնոլորտ՝ սինթեզելով հինը նորի հետ, ուղեկցությամբ Կոմիտասի, Սայաթ-Նովայի, Վիվալդիի, Շոպենի, Դեբյուսիի, Չայկովսկու եւ Ռոդիոն Շչեդրինի երաժշտությամբ:
Հարցին՝ չե՞ն պատրաստվում համագործակցել հայաստանյան թատրոնների հետ, մեր զրուցակիցները պատասխանեցին, որ իրենք դասական երաժշտության սիրահարներ են, հնարավորության դեպքում էլ սիրով «կզգեստավորեն» օպերային կամ բալետային ներկայացում:
Հիշեցնենք, որ այս ցուցադրությունը Թառլոյանների երկրորդ մեծ միջոցառումն է Երեւանում: Առաջինը կայացել է 2006-ին, կառավարության շենքում, ներկայացվել է երկու մասից բաղկացած «Ինկվիզիցիա» եւ «Փախուստ» խորագրերով հավաքածուները:
ՍԱՄՎԵԼ ԴԱՆԻԵԼՅԱՆ
«Առավոտ»
06.03.2018
