«Օրինագծում նշված են «հանրաքվեի են դրվում» կամ «կարող են դրվել» եզրույթները: Ուզում եմ հասկանալ՝ «հանրաքվեի են դրվում»-ի տակ տարածքային փոփոխությունների խնդիրը կարո՞ղ է դրվել»,-ԱԺ-ում «Հանրաքվեի մասին ՀՀ օրենքի նախագծի» քննարկման ժամանակ այսօր նման հարց ուղղեց «Ծառուկյան» խմբակցության պատգամավոր Սերգեյ Բագրատյանը: Արդարադատության փոխնախարար Արթուր Հովհաննիսյանն ի պատասխան հստակեցրեց՝ տարածքային փոփոխությունների հետ կապված հարցը լուծվում է բացառապես հանրաքվեով եւ դա Սահմանադրությամբ է ամրագրված:
Բագրատյանը շարունակեց. «Արցախի հետ կապված անվտանգության գոտիներ ունենք, որոնք վերաբերում են նաեւ ՀՀ-ին: Այս օրինագիծը վերաբերո՞ւմ է անվտանգության գոտիների վերաբերյալ փոխզիջումային տարբերակ քննարկելու հնարավոր դեպքերին»:
Արթուր Հովհաննիսյանը պատասխանեց. «Արցախի անվտանգության գոտիները համարվում են ՀՀ տարածք, թե ոչ, դա այլ հարց է: ՀՀ սահմանադրությամբ՝ խոսքը միայն ՀՀ տարածքին է վերաբերում»: Ապա նույն խմբակցության մեկ այլ պատգամավոր Միքայել Մելքումյանը հարցրեց՝ «Պետական սահմանի մասին» օրենք ունե՞նք: Արթուր Հովհաննիսյանը պատասխանեց. «Իմ հիշելով՝ ունենք «Վարչատարածքային բաժանման մասին» օրենք, որում երեւում են սահմանամերձ մարզերի հստակ քարտեզները:
Լուիզա ՍՈՒՔԻԱՍՅԱՆ
