«Այս օրինագծով մի շարք ոլորտների անձանց արգելվում է նախընտրական քարոզչություն կատարել, բայց հայտնի է, թե ովքեր են մեր երկրում ներգրավվում ընտրակեղծարարության մեջ՝ մանկավարժական կադրերը: Ինչո՞ւ չեք ուզում այդ խնդրից ազատվել: Այս օրինագծում պետք է այդ խնդիրը ներառվի»,-ԱԺ այսօրվա արտահերթ նիստում «Հանրաքվեի մասին ՀՀ օրենքի նախագծի» քննարկման ժամանակ հայտարարեց «Ծառուկյան» խմբակցության պատգամավոր Գեւորգ Պետրոսյանը: «Ելք» խմբակցության պատգամավոր Արտակ Զեյնալյանն էլ թեման շարունակեց. «Մենք առաջարկում ենք ժամանակավորապես արգելել ուսուցիչներին քարոզչություն իրականացնել»:
Զեյնալյանի խոսքով՝ թվում է, թե այդ արգելքը կմիջամտի ուսուցիչների ընտրական իրավունքի իրացմանը, բայց նրանց հարցում արդեն իսկ խտրական մոտեցում կա. «Ուսուցիչների 90 տոկոսը մեկ կուսակցության անդամ է: Չեմ մեղադրում կոնկրետ կուսակցության, բայց ուղղակի իրավիճակն է այդպիսին: Ուսուցիչներն աշխատանքի պահին եւ աշխատանքից դուրս չպետք է քարոզչություն իրականացնեն»:
Արդարադատության փոխնախարար Արթուր Հովհաննիսյանը, անդրադառնալով խնդրին, պնդեց՝ ուսուցիչներին քարոզչությունն իրականացնելն արգելելը կսահմանափակի նրանց ընտրական իրավունքը:
Լուիզա ՍՈՒՔԻԱՍՅԱՆ
