ԱԺ այսօրվա նիստում 2-րդ ընթերցմամբ քննարկվեց Կառավարության ներկայացրած՝ «Հանրային խորհրդի մասին» օրենքի նախագիծը: Արդարադատության նախարարի առաջին տեղակալ Արթուր Հովհաննիսյանը (լուսանկարում), ներկայացնելով օրինագիծը, նշեց՝ դրանով ՀԽ անդամների պաշտոնավարման համար նախատեսվում են երաշխիքներ: «ՀԽ անդամի գործունեության վաղաժամկետ դադարեցման հարց կարող է քննարկվել նրա նշանակումից ոչ շուտ, քան մեկ տարի հետո եւ ոչ ավելի, քան մեկ անգամ: Այս երաշխիքը նախկինում չէր տարածվում ՀԽ նախագահի վրա: Ըստ այդմ, ավելացվել է, որ ՀԽ նախագահի պաշտոնի դադարեցման հարցը կարող է քննարկվել նրա նշանակումից ոչ ուշ, քան մեկ տարի անց»,-տեղեկացրեց Արթուր Հովհաննիսյանը:
Նա նաեւ հայտնեց, որ օրինագծով նախատեսվում է ՀԽ-ին կից ստեղծել ազգային փոքրամասնությունների հարցերով պալատ, որի գործառույթն է լինելու ազգային փոքրամասնությունների իրավունքների իրացման մշտադիտարկումը, ազգային փոքրամասնությունների վերաբերյալ օրենսդրական նախաձեռնությունների առաջարկներ ներկայացնելը, խնդիրները բարձրաձայնելը:
Այս պալատի գործառույթների մանրամասները, ինչպես նշեց Հովհաննիսյանը, կնախատեսվեն «Ազգային փոքրամասնությունների մասին» օրենքով: «Պալատը պետք է դիտարկվի որպես ՀԽ կից գործող մարմին»,-եզրափակեց նա:
Լուիզա ՍՈՒՔԻԱՍՅԱՆ
