«Իր ծննդյան օրը նա գալիս էր Եռաբլուր՝ մի երկու բաժակ խմում էին…նա աշխատում էր չլիներ մարդկանց մեծ զանգվածների մեջ: Իսկ երեկոյան գալիս էր տուն ու մորը ծաղիկներ նվիրում»,-«Եռաբլուրում» այսօր ՀՀ պաշտպանության նախկին նախարար, երջանկահիշատակ Վազգեն Սարգսյանի ծննդյան օրվա առթիվ կազմակերպված հիշատակի միջոցառման ժամանակ լրագրողների հետ զրույցում ասաց Վազգեն Սարգսյանի եղբայրը՝ Արմեն Սարգսյանը:
«Մի քանի ընկերներով էին տանը հավաքվում: Չէր ուզում ծնունդը նշել, անգամ իր տարիքը չէր ուզում հիշել: Այնպես որ, իր ծննդյան օրը սովորականի պես էր անցկացնում: Այդ օրը, ինչպես եւ Նոր տարվա գիշերը, նա ավելի շատ սիրում էր Եռաբլուրում լինել»,-պատմեց նա:
Արմեն Սարգսյանի խոսքով՝ Հոկտեմբերի 27-ը Հայաստանին հետ գցեց առաջընթացից. «Ավելի կարգին Հայաստան կլիներ, քան հիմա ունենք, եթե չլիներ Հոկտեմբերի 27-ը: Ավելի բարոյական Հայաստան կլիներ, եթե Վազգենը ողջ լիներ: Թեեւ հիմա մեր երկիրն առաջ է շարժվում, բանակում էլ առաջընթաց եմ տեսնում»:
Լուիզա ՍՈՒՔԻԱՍՅԱՆ
